საგარეო საქმეთა მინისტრი, დავით ზალკალიანი საქართველოში უნგრეთის საგანგებო და სრულუფლებიან ელჩს, ვიქტორია ჰორვატს შეხვდა.

მხარეებმა ორ ქვეყანას შორის არსებულ მეგობრულ და პარტნიორულ ურთიერთობებზე ისაუბრეს.

სამინისტროს პრესსამსახურის ინფორმაციით, შეხვედრის ფარგლებში ყურადღება გამახვილდა სხვადასხვა სფეროში მიმდინარე ორმხრივ თანამშრომლობაზე. მინისტრმა მადლიერება გამოხატა უნგრეთის მთავრობის სასტიპენდიო პროგრამაზე, რომელიც ქართველ სტუდენტებს უნგრეთის უნივერსიტეტებში ხარისხიანი განათლების მიღების შესაძლებლობას აძლევს.

დადებითად შეფასდა აქტიური ხალხთაშორისი კონტაქტები და ტურისტების რიცხვის ზრდა, რასაც ქუთაისსა და ბუდაპეშტს შორის მოქმედი პირდაპირი ფრენები უწყობს ხელს. მიმდინარე თვიდან, ავიარეისების განხორციელება უკვე თბილისი-ბუდაპეშტის მიმართულებითაც დაიწყება.

მხარეებმა ასევე ისაუბრეს სავაჭრო-ეკონომიკური ურთიერთობების გაძლიერების მნიშვნელობაზე და განიხილეს ამ მიმართულებით სამომავლო თანამშრომლობის კონკრეტული გზები.

მიმდინარე წლის ნოემბერში, უნგრეთის საგარეო საქმეთა და ვაჭრობის მინისტრი პიტერ სიიარტო საქართველოში „თავდაცვისა და უსაფრთხოების“ ყოველწლიურ კონფერენციაში მონაწილეობას მიიღებს.