საქართველოს პარლამენტის აპარატსა და ევროპის საბჭოს საპარლამენტო ასამბლეის გენერალურ სამდივნოს შორის თანამშრომლობის პერსპექტივები განიხილეს პარლამენტის აპარატის უფროსის, გივი მიქანაძის და საქართველოში ევროპის საბჭოს ოფისის ხელმძღვანელის, კრისტიან ურსეს შეხვედრისას.

პარლამენტის პრესსამსახურის ინფორმაციით, გივი მიქანაძემ ევროპელ დიპლომატს პარლამენტის გაძლიერების მიზნით, აპარატში მიმდინარე და განხორციელებულ აქტივობებზე ინფორმაცია მიაწოდა და რეფორმირების შემდგომ ეტაპებზე ისაუბრა. გივი მიქანაძის განცხადებით, ახალი კანონმდებლობის - საქართველოს კონსტიტუციის და პარლამენტის რეგლამენტის ძალაში შესვლის მომენტიდან მნიშვნელოვნად იზრდება საპარლამენტო კონტროლი და ზედამხედველობის ფუნქციები, რაც თავის მხრივ, პარლამენტის აპარატის თანამშრომლებისთვის მეტი ცოდნისა და პრაქტიკული გამოცდილების გაცნობის საჭიროებას წარმოშობს. აღნიშნულ საკითხთან დაკავშირებით, პარლამენტის აპარატის უფროსმა კრისტიან ურსეს ევროპის საბჭოს ეგიდით სასწავლო ვიზიტის გამართვის ინიციატივით მიმართა, რომლიც პარლამენტის აპარატის თანამშრომლებს ერთი კონკრეტული ქვეყნის გამოცდილების გაცნობის შესაძლებლობებს მისცემს.

„კვლევითი მიმართულების განვითარება, სასწავლო კომპონენტის გაძლიერება, აპარატის თანამშრომლების სტაჟირებები, სასწავლო ვიზიტები კონტროლისა და ზედამხედველობის ფუნქციების გამოცდილების გაზიარების მიზნით, ეს ყველაფერი შეიძლება თავმოყრილი იქნეს ერთ დიდ პროექტში, რომელიც შესაძლოა ევროპის საბჭოს მონაწილეობით დაიგეგმოს და შესაბამისი თანხების მოძიებით საქართველოს პარლამენტის მხარდასაჭერად განხორციელდეს“, - აღნიშნა გივი მიქანაძემ.
საქართველოში ევროპის საბჭოს ოფისის ხელმძღვანელი აპარატის უფროსის ინიციატივას მიესალმა და განაცხადა, რომ სტრასბურგში შესაბამის სტრუქტურებთან კონსულტაციების შემდეგ, პროგრამის განხორციელების შესახებ მეტი ინფორმაცია ექნება, რომელსაც პარლამენტის აპარატს გაუზიარებს.

კრისტიან ურსესთან გამართულ შეხვედრაზე, მხარეებმა პარლამენტის აპარატის თანამშრომლების სტრასბურგში ყოველწლიური სტაჟირების გავლის შესაძლებლობებიც განიხილეს. როგორც აპარატის უფროსმა აღინიშნა,გივი მიქანაძე ვოიცეხ სავიცკისთან ამ თემაზე სასაუბროდ შეხვედრას, ოქტომბერში, IPU-ს ფარგლებში, ჟენევაში გამართულ შეხვედრებზე გეგმავს.