საქართველოს პარლამენტის თავმჯდომარე ირაკლი კობახიძემ ინდონეზიის რესპუბლიკის საპარლამენტო დელეგაცია მიიღო, რომელსაც წარმომადგენელთა პალატის ვიცე-სპიკერი, უტუტ ადიანტო ხელმძღვანელობს.

მხარეებმა ორ ქვეყანას შორის არსებული ურთიერთობებზე ისაუბრეს და ორმხრივი თანამშრომლობის განვითარების მიმართულებები მიმოიხილეს.

პარლამენტის პრესსამსახურის ინფორმაციით, შეხვედრაზე საპარლამენტთაშორისო კავშირების გაღრმავების მნიშვნელობაზე გამახვილდა ყურადღება. შეხვედრაზე შეთანხმდნენ, რომ საქართველოს პარლამენტსა და ინდონეზიის რესპუბლიკის პარლამენტში მეგობრობის ჯგუფები შეიქმნება.

ორმხრივი თანამშრომლობის პერსპექტიულ მიმართულებებად მხარეებმა ეკონომიკა, განათლება, ტურიზმი და სპორტი დაასახელეს და ამ მიმართულებებით აქტიურ ურთიერთობაზე შეთანხმდნენ. წარმომადგენელთა პალატის ვიცე-სპიკერმა აღნიშნა, რომ საქართველოს შთამბეჭდავი ტურისტული პოტენციალი აქვს. მისივე შეფასებით, ბათუმმა 43-ე საჭადრაკო ოლიმპიადას წარმატებით უმასპინძლა.

საუბარი შეეხო საქართველოს როლს რეგიონში, საგარეო პოლიტიკურ და უსაფრთხოების გამოწვევებს, ასევე ინდონეზიის რესპუბლიკის მხრიდან ჩვენი ქვეყნის მხარდაჭერის მნიშვნელობას.