პოლიტიკური პარტიები „თავისუფალი საქართველო“, „ტრადიციონალისტთა კავშირი“ და „თეთრები“ რეალურ ოპოზიციურ ძალებს თანამშრომლობისა და მაჟორიტარი კანდიდატების თაობაზე შეთანხმებისკენ მოუწოდებენ.
ამის თაობაზე დღეს აღნიშნულმა პარტიებმა საგანგებო განცხადება გაავრცელეს და შეშფოთება გამოთქვეს წინასაარჩევნო პროცესში დაფიქსირებული დარღვევების გამო.
პარტიათა წარმომადგენლების განცხადებით, ხელისუფლებამ ხალხისთვის განკუთვნილი ფინანსები საკუთარ საარჩევნო ინტერესებს დაუქვემდებარა ხოლო, ოპონენტი პარტიების ფულადი შემოსავლები - აუდიტის სამსახურს.
საგანგებო განცხადებაში აღნიშნულია, რომ რეალური ოპოზიციური ძალების დაქსაქსულობა შემაშფოთებელია და ამდენად, აუცილებელია კონსულტაციების დაწყება ერთიანი დემოკრატიული ფრონტის შესაქმნელად.
პარტიების წარმომადგენლები მიმართავენ ხელისუფლებას, საჯარო გახადოს იმ მოქალაქეთა სია, რომლებიც 90-იანი წლების დასაწყისში ქვეყნიდან გავიდნენ და დღემდე არ დაბრუნებულან. „თავისუფალი საქართველო“, „ტრადიციონალისტთა კავშირი“ და „თეთრები“, ამ კუთხით თანადგომას ევროკავშირს, ევროგაერთიანებას და სხვა საერთაშორისო ორგანიზაციებს სთხოვენ, რათა მათ დახმარება გაუწიონ პარტიებს საქართველოს მოქალაქეთა იმ სიების მოპოვებაში, რომლებმაც სხვადასხვა ქვეყნის საზღვარი გადაკვეთეს და საქართველოში არ დაბრუნებულან.
„ერთობლივი ძალისხმევით, არჩევნების მეორე დღესვე, შესაძლებელი უნდა გახდეს იმ ამომრჩეველთა გასაჯაროება, რომლებმაც არჩევნებში მიიღეს მონაწილეობა. კატეგორიულად ვაცხადებთ, რომ ყველას ვინც ხელს შეუშლის ოპოზიციურ პარტიათა კოორდინაციას, ოქტომბრის არჩევნებში სააკაშვილის ტრიუმფალური გამარჯვების შემთხვევაში პასუხისმგებლობა დაეკისრებათ“ - განაცხადა „თეთრების“ ლიდერმა თემურ შაშიაშვილმა.
ოპოზიცური პარტიების წარმომადგენლები განცხადებაზე ხელმოსაწერად ყველა ოპოზიციურ ძალას იწვევენ.