პარლამენტის ევროპასთან ინტეგრაციის კომიტეტის თავმჯდომარე თამარ ხულორდავა საფრანგეთის რესპუბლიკის სენატის წევრებს ჟიზელ ჟურდას და რენე დანესის შეხვდა.



მხარეებმა ორმხრივი თანამშრომლობის სხვადასხვა მიმართულებებზე ისაუბრეს. სტუმრებმა, საფრანგეთის სახელით, საქართველოს ევროპული ინტეგრაციისადმი მხარდაჭერა კიდევ ერთხელ დაადასტურეს.



თამარ ხულორდავამ ფრანგ სენატორებს საქართველოში განხორციელებული და მიმდინარე რეფორმები გააცნო. შეხვედრაზე საუბარი შეეხო სამომავლო თანამშრომლობის პერსპექტივებს.



„ფრანგ სენატორებთან განვიხილეთ საფრანგეთის და საქართველოს თანამშრომლობის საკითხები და რა თქმა უნდა, ის როლი, რაც საფრანგეთს, როგორც ევროკავშირის ერთ-ერთ მნიშვნელოვან და წამყვან ქვეყნას, საქართველოს ევროპული ინტეგრაციის პროცესში აქვს.



მათ საქართველოს გაცხადებული კურსის - ევროკავშირში ინტეგრაციისადმი მხარდაჭერა მომავალშიც აღგვითქვეს. აღინიშნა, რომ ამ მიზნის რეალობად ქცევა გარკვეულ დროსთან და დამატებით ძალისხმევასთან იქნება დაკავშირებული სხვადასხვა მიმართულებით და ამ მხრივ ჩვენ, ასევე შეგვიძლია გვქონდეს უფრო მჭიდრო თანამშრომლობის იმედი ფრანგულ მხარესთან.



ვისაუბრეთ ქვეყანაში მიმდინარე რეფორმებზეც. ფრანგ სენატორებს საკმაოდ კარგი წარმოდგენა აქვთ სხვადასხვა მიმართულებით გადადგმულ ნაბიჯებთან და განხორციელებულ რეფორმებთან დაკავშირებით. განსაკუთრებით აღნიშნეს, რომ ჩვენს ქვეყანაში მოქალაქეებისთვის საჯარო სერვისების ხელმისაწვდომობა ძალიან მაღალ დონეზეა უზრუნველყოფილი, რაც მათთვის განსაკუთრებული ინტერსის საგანი იყო“,-აღნიშნა შეხვედრის კომენტირებისას თამარ ხულორდავამ.

​