გაეროს გენერალური ასამბლეის ფარგლებში გამოქვეყნდა გაეროს გენერალური მდივნის დამოუკიდებელ ექსპერთა საბჭოს (IAP) 2018 წლის ანგარიში, რომელიც ეხება დედათა, ბავშვთა და ახალგაზრდების ჯანმრთელობის სფეროში კერძო სექტორის პასუხისმგებლობას.

შეხვედრას ესწრებოდნენ საერთაშორისო საპარლამენტო კავშირის, მსოფლიო ეკონომიკური ფორუმის, გაეროს სააგენტოებისა და სხვა საერთაშორისო ორგანიზაციების ხელმძღვანელები.

დამოუკიდებელ ექსპერტთა საბჭოს მთავარი რეკომენდაცია ჯანდაცვის, ფარმაცევტული და კვებითი მრეწველობის სფეროებში კერძო სექტორის პასუხისმგებლობასა და რეგულირების აუცილებლობას ეხება. ანგარიშში ასევე შესულია საქართველოს გამოცდილება 2018 წლის თებერვალში IAP საბჭოს წევრების თბილისში ვიზიტის შემდგომ.

მარიამ ჯაშმა შეხვედრაზე წარადგინა ქვეყნის გამოცდილება ჯანდაცვის სფეროში კერძო სექტორის დომინანტური როლის გათვალისწინებით.

„სრულად ვიზიარებ IAP რეკომენდაციას, რომ ჯანდაცვა არ არის ეკონომიკური ბაზრის სტანდარტული პროდუქტი. ჯანდაცვის სფეროში კერძო სექტორის რეგულირება აუცილებელია სამედიცინო და საზოგადოებრივი ჯანდაცვის ხელმისაწვდომობისა და ხარისხის უზრუნველსაყოფად. განსაკუთრებით მნიშვნელოვანია რეგულურება დაბალი და საშუალო შემოსავლის ქვეყნებში, სადაც მტკიცებულებაზე დაფუძნებული სამედიცინო პრაქტიკა ჯერ კიდევ არ არის ფართოდ დანერგილი. საქართველოში უკვე მოქმედებს სავალდებულო რეგულაციები კერძო სექტორის სერტიფიცირების, ანგარიშვალდებულებისა და მართვის საინფორმაციო სისტემების მიმართულებით. თუმცა ჩვენ გვჭირდება დამატებით საერთაშორისო გამოცდილების გაზიარება, თუ როგორ შეიძლება ჯანდაცვის სფეროში ხარისხისა და დანახარჯების უფრო ეფექტური მართვა. ასევე გვჭირდება წარმატებული მოდელები - თუ როგორ შეიძლება კერძო სექტორის დაინტერესება ჯანმრთელი საკვები პროდუქციის საწარმოებლად და მისაწოდებლად საგანმანათლებლო გარემოში. დაბოლოს, ნება მომეცით, ხაზი გავუსვა კერძო სექტორის როლს დამატებითი ფინანსური რესურსების მოზიდვის კუთხით. ჩვენ შეგვიძლია ერთობლივად ვიმუშაოთ და ხელი შევუწყოთ კერძო სექტორს არა მხოლოდ მტკიცებულებებზე დაფუძნებული პოლიტიკის, არამედ ახალი დაფინანსების პლატფორმების შესაქმნელად ქალთა, ბავშვთა და ახალგაზრდობის ჯანმრთელობის გაუმჯობესების მიზნით“, - აღნიშნა კომიტეტის თავმჯდომარემ.

მარიამ ჯაში მთავარ შეხვედრას გაეროს გენერალური ასამბლეის ფარგლებში დღეს გამართავს ინოვაციური დაფინანსების გლობალური სამდივნოს პრეზიდენტის რანგში.