საქართველოს პრემიერ-მინისტრის, მამუკა ბახტაძის განცხადებით, საქართველოში გადასახადი ყველამ უნდა გადაიხადოს, მიუხედავად იმისა, ვინმე პარალელურად მედია აქტივის მფლობელი არის თუ არა.
ეს განცხადება მან ტელეკომპანია ”იბერიასა” და "ომეგა ჯგუფის" საქმეზე გავრცელებულ აუდიჩანაწერებთან დაკავშირებით, ჟურნალისტებთან საუბრისას გააკეთა.

"საქართველოში არის კანონის უზენაესობა. ადამიანი, რომელიც ჩაიდენს დანაშაულს, მან პასუხი უნდა აგოს. მეორე საკითხი რაც არის და რომელიც შეეხება საგადასახადო დავალიანებას, მინდა კიდევ ერთხელ განვმარტო, რომ მას არანაირი კავშირი არ აქვს თავისუფალ მასმედიასთან და ტელევიზიასთან.
ეს არის ქარხანა, კომერციული საქმიანობა, რომელიც აწარმოებს თამბაქოს და მას აქვს შესაბამისი გადასახადები, მათ შორის სააქციზო გადასახადი. გადასახადი კი საქართველოში ყველამ უნდა გადაიხადოს მიუხედავად იმისა, ვინმე პარალელურად არის თუ არა მფლობელი რაღაცა მედია აქტივის,"-განაცხადა მამუკა ბახტაძემ.