საქართველოს საგარეო საქმეთა მინისტრის მოადგილემ, ვახტანგ მახარობლიშვილმა კასპიის ბიზნეს ფორუმში მონაწილეობა მიიღო, რომელიც ნიუ-იორკში, ჰარვარდის კლუბში, ამერიკის შეერთებული შტატების სავაჭრო პალატისა და კასპიის პოლიტიკის ცენტრის ორგანიზებით გაიმართა.

საგარეო საქმეთა სამინისტროს პრესსამსახურის ცნობით, ღონისძიებას აშშ-ს ბიზნეს წრეების, სავაჭრო ორგანიზაციების, ასევე კასპიის რეგიონის ქვეყნების ოფიციალური პირები ესწრებოდნენ. დისკუსიის ფარგლებში საუბარი კასპიის რეგიონის პოლიტიკურ და ეკონომიკურ გარემოს, რეგიონის ქვეყნების განვითარების პოტენციალს და არსებულ საინვესტიციო შესაძლებლობებს შეეხო.

საკუთარ გამოსვლაში საქართველოს საგარეო საქმეთა მინისტრის მოადგილემ კასპიის რეგიონის მნიშვნელობაზე ისაუბრა, მათ შორის ევროპისთვის ენერგო მატარებლების დივერსიფიკაციის თვალსაზრისით. მან, ასევე საქართველოს დიდ მნიშვნელობასა და პოტენციალზე კასპიის ზღვის ენერგო რესურსების ევროპისთვის მიწოდების პროცესში ისაუბრა.

მინისტრის მოადგილემის წარმატებული ეკონომიკური და დემოკრატიული რეფორმები მიმოიხილა, რომელმაც ქვეყანა ეკონომიკური თვალსაზრისით რეგიონალურ ჰაბად გადააქცია. ვახტანგ მახარობლიშვილმა ყურადღება გაამახვილა კასპიის რეგიონის ქვეყნების განვითარებისა და ზოგადად რეგიონის სტაბილურობისათვის ისეთ მნიშვნელოვან ფაქტორებს, როგორიც გახლავთ დემოკრატიული და ინსტიტუციური რეფორმები და ინფრასტრუქტურის განვითარება.

ვახტანგ მახარობლიშვილმა რეგიონის ცალკეულ ქვეყნებთან თანამშრომლობის წარმატებულ მაგალითებზე, ასევე საქართველოს ევროპული და ევრო-ატლანტიკური ინტეგრაციის პროცესსა და შესაძლებლობებზე ისაუბრა.

ფორუმზე საქართველოს მონაწილეობით მიმდინარე და დაგეგმილი სატრანზიტო და ენერგეტიკული პროექტები დადებითად შეფასდა, ასევე აღინიშნა, რომ საქართველო თავისი უნიკალური გამოცდილებით და ქვეყნის განვითარების პროგრესით მნიშვნელოვანი ხიდია დასავლეთსა და კასპიის აუზის ქვეყნებს შორის.