ეუთოს საპარლამენტო ასამბლეის პრეზიდენტმა, საქართველოს პარლამენტის წევრმა, გიგი წერეთელმა მილი მეჯლისის 100 წლის იუბილესთან დაკავშირებით ბაქოში გამართულ საზეიმო ღონისძიებებში მიიღო მონაწილეობა.

გიგი წერეთელმა დამსწრეთ სიტყვით მიმართა და საიუბილეო თარიღი მიულოცა.
,,გარდა იმისა, რომ მე დღეს ევროპის ერთ-ერთ ყველაზე დიდ პოლიტიკურ ინსტიტუტს წარმოვადგენ, ჩემთვის მეტად სასიხარულოა ის, რომ ასევე წარმოვადგენ მეზობელ და მოძმე საქართველოს“ - განაცხადა გიგი წერეთელმა.

მან ასევე ისაუბრა აზერბაიჯანის პარლამენტის მდიდარ ისტორიაზე და აღნიშნა, რომ საუკუნის წინ ამ ქვეყანაში საკანონმდებლო ორგანო დაფუძნდა, რომელიც დემოკრატიულ ინსტიტუტებს ავითარებდა, იცავდა ქალთა და უმცირესობის უფლებებს და ხელს უწყობდა ქვეყნის ეკონომიკური პოტენციალის განვითარებას.

“სწრაფ ეკონომიკურ განვითარებასთან ერთად აუცილებელია დემოკრატიული კონსოლიდაცია, კონფლიქტის მშვიდობიანი გზით მოგვარება, და ამ პროცესში საპარლამენტო დემოკრატია, დიპლომატია მნიშვნელოვან როლს თამაშობს. ეუთო მზადაა ამ საკითხებში აზერბაიჯანის ქმედითი პარტნიორი იყოს“, - განაცხადა გიგი წერეთელმა.

ეუთოს საპარლამენტო ასამბლეის პრეზიდენტი ბაქოში ვიზიტისას, აზერბაიჯანის პრეზიდენტს ილხამ ალიევს, პარლამენტის თავმჯდომარეს ოქტაი ასადოვს, პარლამენტის ვიცე-სპიკერს, ბაჰარ მურადოვას და აზერბაიჯანის პარლამენტის სხვა ლიდერებს შეხვდა. გიგი წერეთელმა ორმხრივი შეხვედრები თურქეთის, ბულგარეთის, ბოსნია-ჰერცოგოვინის, პაკისტანის პარლამენტების სპიკერებთანაც გამართა.
აზერბაიჯანის პარლამენტის 100 წლისთავისადმი მიძღვნილ ღონისძიებას 44 ქვეყნის 300-მდე სტუმარი დაესწრო.