საქართველოს პარლამენტის თავმჯდომარის, ირაკლი კობახიძის განცხადებით, კანაფის კულტივაციასთან დაკავშირებით კანონის მიღებამდე მმართველი პარტია აუცილებლად მოუსმენს საზოგადოებას, ეკლესიას და პატრიარქს.
ამის შესახებ ირაკლი კობახიძემ მარიხუანას მოხმარებასთან დაკავშირებული კანონპროექტის შესახებ საუბრისას განაცხადა.
„ჩვენ აუცილებლად მოვუსმენთ როგორც საზოგადოებას, ისე ეკლესიას, პატრიარქს და ამის საფუძველზე მივიღებთ საბოლოო გადაწყვეტილებას“,- განაცხადა ირაკლი კობახიძემ.

მარიხუანას კულტივაცია-რეალიზაციის საკითხის განხილვის გადადებასთან დაკავშირებით დასმული კითხვის პასუხად, ირაკლი კობახიძემ განაცხადა, რომ გადაწყვეტილება ამ მნიშვნელოვან საკითხთან დაკავშირებით ფართო კონსულტაციების შედეგად იქნება მიღებული და მისი მიღებისას განსაკუთრებული ყურადღება დაეთმობა ამ გადაწყვეტილების აღქმას საზოგადოების მიერ.

„ჩვენ, რაც მთავარია, ვუსმენთ საზოგადოებას, ეკლესიას, ეს არის ჩვენთვის ძალიან მნიშვნელოვანი და კიდევ ერთხელ შეგვიძლია განვაცხადოთ, რომ გადაწყვეტილება ამ ძალიან მნიშვნელოვან საკითხთან დაკავშირებით აუცილებლად იქნება მიღებული ფართო კონსულტაციების საფუძველზე. ამაში იქნება ჩართული ფართო საზოგადოება, მათ შორის რა თქმა უნდა ეკლესია და ასეთი კონსულტაციების საფუძველზე მივიღებთ ჩვენ საბოლოოდ გადაწყვეტილებას, რომელიც იქნება ქვეყნის ინტერესების შესაბამისი და ჩვენი სახელმწიფოს ინტერესების შესაბამისი.

ჩვენ მივიღებთ იმ გადაწყვეტილებას, რომელიც არის საზოგადოების ინტერესებში და ასევე, განსაკუთრებულ ყურადღებას დავუთმობთ ამ გადაწყვეტილების მიღებისას საზოგადოების აღქმასაც. ანუ ერთია საზოგადოების ინფორმირება, მეორეა მისი აღქმა, მესამეა გადაწყვეტილების შინაარსი. ყველა ამ საკითხს მიექცევა ყურადღება, როდესაც ჩვენ მივიღებთ საბოლოო გადაწყვეტილებას“,- განაცხადა პარლამენტის თავმჯდომარემ.

ირაკლი კობახიძემ ჟურნალისტებთან საუბრისას, დაადასტურა, რომ გუშინ, საკითხთან დაკავშირებით, შეხვედრა საქართველოს კათოლიკოს-პატრიარქსა და საპატრიარქოს წარმომადგენლებთან გაიმართა.

„გვქონდა ძალიან კარგი საუბარი ამ საკითხთან დაკავშირებით. პატრიარქი არის არა მხოლოდ ჩვენი სულიერი ლიდერი და ეკლესიის ხელმძღვანელი, არამედ ის არის ბრძენი ადამიანი და მას აქვს ყოველთვის სწორი პოზიცია იმ საკითხებთან დაკავშირებით, რომელიც ეხება ზოგადად ჩვენს ქვეყანაში მიმდინარე პროცესებს. აქედან გამომდინარე, ჩვენ აუცილებლად მოვუსმენთ როგორც საზოგადოებას, ისე ეკლესიას, პატრიარქს და ამის საფუძველზე მივიღებთ საბოლოო გადაწყვეტილებას“,- განაცხადა ირაკლი კობახიძემ.

მისივე თქმით, დაიწყება აქტიური კონსულტაციები, რათა, კანონპროექტის შინაარსი, პირველ რიგში, საზოგადოებას გაეცნოს. პარლამენტის თავმჯდომარემ ხაზგასმით აღნიშნა, რომ არცერთ შემთხვევაში აქ არ არის საუბარი ნარკოტიკების წარმოებასა და რეალიზაციაზე.
„შეჩერებულია კანონპროექტის განხილვა და დავიწყებთ ძალიან აქტიურ კონსულტაციებს ყველასთან იმისთვის, რომ გავაცნოთ საზოგადოებას კანონპროექტის შინაარსი. მაგალითად, ვუთხრათ საზოგადოებას ის, რასაც არასწორად ეუბნებოდნენ ჩვენი ოპონენტები, ვუთხრათ ის, რომ აქ არ არის არცერთ შემთხვევაში საუბარი ნარკოტიკების წარმოებასა და რეალიზაციაზე. ეს არის მკაფიოდ გამოსაკვეთი, იმიტომ, რომ საზოგადოებას დღეს სხვა რამე ჰგონია. ამაზე საჭიროა ინფორმირება და გარდა ინფორმირებისა, საჭიროა კონსულტაციები, რომლის საფუძველზეც უნდა მივიღოთ ჩვენ გადაწყვეტილება. არ ვიცი, ვერ გეტყვით ზუსტად რა დრო დასჭირდება ამ კონსულტაციებს. მთავარია, რომ ჩვენ მივიღოთ შეჯერებული გადაწყვეტილება და რამდენი დროც დაგვჭირდება, იმდენს მოვანდომებთ”,- განაცხადა ირაკლი კობახიძემ.

მან კიდევ ერთხელ აღნიშნა, რომ ამოცანა არის მოხმარების რეგლამენტაცია და ეს ყველაფერი საკონსტიტუციო სასამართლოს გადაწყვეტილების შესაბამისად გადაწყდება.

„ეს გაკეთდება იმ ფარგლებში, რა ფარგლებიც ჩვენ დაგვიტოვა საკონსტიტუციო სასამართლოს გადაწყვეტილებამ. ბუნებრივია, ამ ფარგლებს ჩვენ ვერ გავცდებით და არც გავცდებით. გვექნება დამატებითი კონსულტაციები და ყველაფერი გადაწყდება საკონსტიტუციო სასამართლოს გადაწყვეტილების შესაბამისად. ეს არის ჩვენი ვალდებულება. თუმცა, ამ ფარგლებში და ამ ჩარჩოებში, ჩვენი პოზიცია არის ის, რომ მაქსიმალური მკაცრი რეგლამენტაცია უნდა განხორციელდეს ჩვენს ქვეყანაში მარიხუანას მოხმარების ასე ვთქვათ, რეგლამენტაციის კუთხით”, - განაცხადა საქართველოს პარლამენტის თავმჯდომარემ.