საქართველოს პარლამენტის გარემოს დაცვისა და ბუნებრივი რესურსების კომიტეტის თავმჯდომარე, კახა კუჭავა ჩეხეთის რესპუბლიკის წარმომადგენელთა პალატის გარემოს დაცვის კომიტეტის წევრებს შეხვდა.



მხარეებმა ორმხრივი ურთიერთობები მიმოიხილეს და ხაზგასმით აღნიშნეს აქტიური საპარლამენტთაშორისო თანამშრომლობის მნიშვნელობა.



საუბარი შეეხო მაღალმთიანი რეგიონების მდგრად განვითარებას, ჩეხეთის რესპუბლიკის მთავრობის მიერ ჩვენს ქვეყანაში განხორციელებულ და მიმდინარე პროგრამებს.



მხარეებმა, ასევე, საქართველოს კანონმდებლობის ევროკავშირის კანონმდებლობასთან ჰარმონიზაციისა და ამ მიმართულებით, ორი ქვეყნის საპარლამენტო კომიტეტს შორის მჭიდრო თანამშრომლობის შესახებ ისაუბრეს.



როგორც შეხვედრის დასრულების შემდეგ საქართველოს პარლამენტის გარემოს დაცვისა და ბუნებრივი რესურსების კომიტეტის თავმჯდომარემ აღნიშნა, შეხვედრაზე ჩეხმა დეპუტატებმა საქართველოს მიმართ მხარდაჭერა და დინამიური თანამშრომლობის სურვილი დაადასტურეს.



„ჩეხეთის მთავრობა ძალიან ეხმარება საქართველოს სხვადასხვა პროგრამის განხორციელებაში. ვისაუბრეთ ჩვენი კანონმდებლობის ევროკავშირის დირექტივებთან ჰარმონიზაციაზე, ქართულ რეალობასთან მის სწორად მორგებასა და ამ მიმართულებით თანამშრომლობაზე.

ამ კუთხით მათ საინტერესო გამოცდილება აქვთ და დიდი ინტერესი გააჩნიათ, დაეხმარონ საქართველოს. დარწმუნებული ვარ, რომ ჩვენი თანამშრომლობა მომავალშიც ძალიან პროდუქტიული იქნება. ყოველთვის სასიამოვნოა, პირადად გაიცნო კოლეგები და შემდეგ უკვე კონკრეტულად დაგეგმო ის აქტივობები, რომელიც კიდევ უფრო პროდუქტიულს გახდის ორი ქვეყანას შორის თანამშრომლობას“,- განაცხადა კახა კუჭავამ.