საქართველოს მთავრობის რეგიონული მართვის მიმართულების ხელმძღვანელმა, სოზარ სუბარმა სამცხე-ჯავახეთში, ახალი გუბერნატორი ბესიკ ამირანაშვილი წარადგინა.

როგორც წარდგენისას სოზარ სუბარმა განაცხადა, ამირანაშვილს დიდი გამოცდილება აქვს, რაც ამ უდიდესი პოტენციალის მქონე რეგიონის განვითარებას მნიშვნელოვნად წაადგება.

„საქართველოს ამ უძველეს კუთხეში, სამცხე-ჯავახეთში, ახალი გუბერნატორი ბესიკ ამირანაშვილი წარვადგინეთ. ადამიანი, რომელსაც აქვს ძალიან დიდი გამოცდილება. მისი გამოცდილება ძირითადად პოლიციურ საქმიანობას უკავშირდება, თუმცა სამოქალაქო სფეროში მინისტრის მოადგილის პოსტსაც იკავებდა. ხშირად სვამენ კითხვას, რატომ გადადიან ძალოვანი უწყებებიდან სამოქალაქო სფეროში, ეს ბუნებრივი პროცესია, ჩვენ ერთი საზოგადოება ვართ და სადაც ჩვენს ქვეყანას სჭირდება იქ უნდა ვიმსახუროთ. სწორედ ამის მაგალითია ბესიკ ამირანაშვილი, ადამიანი რომელსაც აქვს საზოგადოებასთან ურთიერთობის უნარი და 24-საათიანი მუშაობის გამოცდილება“-განაცხადა სუბარმა.

მისივე თქმით, სამცხე-ჯავახეთი ძალიან მნიშვნელოვანი კუთხეა, რადგან გარდა ისტორიული ღირსშესანიშნაობებისა, სოფლის მეურნეობისა და სატრანზიტო გადაზიდვების მიმართულებით განვითარების უზარმაზარი პოტენციალი აქვს, რომლის 10%-იც არ არის ათვისებული.

„კარგად არის განვითარებული ბორჯომი და ბაკურიანი, თუმცა არის მთელი რიგი მუნიციპალიტეტები, სადაც ეს პოტენციალი არ არის გამოყენებული. სწორედ ამიტომ, ხორციელდება ინფრასტრუქტურული პროექტები, რომელიც ამ პოტენციალის სრულად ათვისების შესაძლებლობას მოგვცემს. მაგალითად ახალციხე-ზარზმა-ბათუმის გზა განავითარებს როგორც ახალციხისა და ადიგენის მუნიციპალიტეტებს, ისე დადებით გავლენას მოახდენს ბათუმსა და მაღალმთიან აჭარაზე და ტურიზმის განვითარებას შეუწყობს ხელს. მეორე გზა, რომელიც ასევე მნიშვნელოვანია და მალე გაკეთდება, ეს არის ბაკურიანი-ტაბაწყური-ახალციხის გზა, რომელიც, ახალციხეს კიდევ უფრო დაახლოებს დედაქალაქთან და ამასთან, საშუალებას მოგვცემს ტურისტულად განვითარდეს ულამაზესი მხარე ტაბაწყური და ახალი ტურისტული ნაკადი შეემატოს ჩვენს ქვეყანას. მესამე, უმთავრესი მაგისტრალი, აღმოსავლეთის და დასავლეთის დამაკავშირებელი რკინიგზა, რომელიც გადის ახალქალაქზე. ეს რკინიგზა შექმნის უამრავ სამუშაო ადგილს და ხელს შეუწყობს ბიზნესის განვითარებს, არა მხოლოდ ამ რეგიონში, არამედ მთელს საქართველოში, მაგრამ განსაკუთრებით რეგიონისთვის იქნება მნიშვნელოვანი. არაერთი ინფრასტრუქტურული პროექტი ხორციელდება აბასთუმანში, რომელიც არის ამ კუთხის ერთ-ერთი მარგალიტი და რომელიც უსამართლოდ იყო დავიწყებული წლების განმავლობაში. წელს, აბასთუმანი სავსეა ტურისტებით და ძალიან მალე ის გახდება ერთ-ერთი საყვარელი ადგილი, არა მხოლოდ ჩვენი მოქალაქეებისთვის, არამედ უცხოელი ტურისტებისთვისაც. მთელი ამ პოტენციალის ათვისება მოგვცემს საშუალებას, რომ სამცხე-ჯავახეთი უმდიდრესი მხარე გახდეს“-განაცხადა სუბარმა.