საქართველოს პრეზიდენტმა მიხეილ სააკაშვილმა დღეს თელავის რაიონში სტიქიის ლიკვიდაციის მიზნით მიმდინარე სამუშაოები დაათვალიერა.
იგი თავისუფლების ქუჩაზე თავდაცვის მინისტრ დიმიტრი შაშკინთან ერთად იმყოფებოდა.
სტიქიის ზონაში თავდაცვის სამინისტროს ტექნიკა და რეზერვისტთა ასეულებია მობილიზებული. პრეზიდენტი მათ პირადად გაესაუბრა და გაწეული სამუშაოსთვის მადლობა გადაუხადა.
„თქვენი იმედი უნდა ჰქონდეს ხალხს და აქაურ საზოგადოებას. მთავარია, რომ გადავრჩით. თელავს ისე გავაკეთებთ, როგორიც არასოდეს ყოფილა“- აღნიშნა სააკაშვილმა.
პრეზიდენტი დღესვე, თელავის რაიონის სოფელ შალაურსაც ესტუმრა და ადგილობრივებს გაესაუბრა.
სააკაშვილმა მოსახლეობას ის გეგმები და პროგრამები გააცნო, რომელთაც მთავრობა სტიქიით დაზარალებულ რეგიონებში, სოფლებსა და ქალაქებში ახორციელებს.
როგორც სააკაშვილმა აღნიშნა, მთავარია, რომ ყველა დაზარალებული მთავრობისგან კომპენსაციას მიიღებს.
„დაზარალებულთა 90% 1 500 ლარს მიიღებს. ასევე, მათ კრედიტების დაფარვა გადაუვადდებათ“ - განაცხადა სააკაშვილმა.
მისი თქმით, თურქეთიდან უკვე ჩამოაქვთ სპეციალური ინვენტარი და გარდა ამისა, მოსახლეობას სასურსათო პაკეტებიც დაურიგდება.
„ასეთ რამეს არავინ ელოდა. მომავალ წელს ბანკები უნდა დაავავალდებულოთ, რომ კრედიტთან ერთად პირობებში დაზღვევა ჩადონ. იმის შემყურე ხომ არ ვიქნებით როდის რა იქნება. მთავრობა არ მოისვენებს მანამ, სანამ ყველა სახურავი არ გაკეთდება და კომპენსაციას ყველა არ მიიღებს“ - განაცხადა მიხეილ სააკაშვილმა.
მისივე თქმით, განკარგულება გასცა, რომ სასურსათო პაკეტი თელავის სოფლებშიც დარიგდეს.
19 ივლისს ძლიერმა წვიმამ, რომელსაც თან ქარიშხალი და სეტყვა ახლდა, საქართველოს რეგიონები დააზარალა. განსაკუთრებული ზიანი კახეთს, მცხეთა-მთიანეთისა და სამცხე-ჯავახეთის რეგიონებს მიადგა. მცხეთა-მთიანეთში რამდენიმე მიმართულებით გზებიც ჩახერგილი იყო.