განათლების, მეცნიერებისა და კულტურის კომიტეტის თავმჯდომარე მარიამ ჯაში დელოიტის საკონსულტაციო ჯგუფის წარმომადგენელს, ჯესიკა მაენოს, USAID-ის მმართველობა განვითარებისთვის პროგრამის მრჩეველს, მალხაზ ნიკოლაშვილსა და ილიას სახელმწიფო უნივერსიტეტის საჯარო პოლიტიკის ადმინისტრირების ლექტორს ელექტრონულ მმართველობაში, მერაბ ლაბაძეს შეხვდა.

შეხვედრის მთავარ თემას წარმოადგენდა ერთობლივი მისია, რომელიც ხორციელდება ამერიკის შეერთებული შტატების საერთაშორისო განვითარების სააგენტოს USAID-ის ხელშეწყობით.

საკონსულტაციო მისია მუშაობს შეფასებასა და შესაბამისი რეკომენდაციების შემუშავებაზე, თუ როგორ შეიძლება გაძლიერდეს ინოვაციებისა და ტექნოლოგიების მიმართულება საქართველოში.

რეკომენდაციები საფუძვლად დაედება ინოვაციებისა და ტექნოლოგიების გრძელვადიანი სტრატერგიის ხედვას, რომელიც ქვეყნის განვითარებისთვის მნიშვნელოვანი იქნება.

სტუმრებმა მოისმინეს კომიტეტის შეხედულებები, თუ რა ნაბიჯები შეიძლება გადაიდგას ინოვაციებისა და ტექნოლოგიების განვითარების ხელშეწყობისთვის. მარიამ ჯაშმა მათ გააცნო ამავე თემაზე ევროკავშირის მხარდაჭერით შემუშავებული რეკომენდაციების პაკეტი, რომელსაც კომიტეტი განათლების, მეცნიერების, კულტურისა და სპორტის სამინისტროსთან ერთად იხილავს.

„ჩვენ გვჭირდება მეტი ინვესტიციები ინოვაციებსა და ტექნოლოგიებში, ინვესტიციები მოიცავს როგორც ფინანსური, ასევე საკადრო რესურსის განვითარებას სახელმწიფო და საერთაშორისო თანამშრომლობითი პროგრამებიდან. ჩვენ გვჭირდება ზუსტი მეცნიერებების სწავლების გაძლიერება განათლების ყველა საფეხურზე და მაქსიმალურად თანამედროვე ტექნოლოგიების შემოტანა სკოლაში, კოლეჯებსა და უნივერსიტეტებში ფიზიკის, მათემატიკის, ქიმიის თუ საბუნებისმეტყველო საგნების შესწავლის პროცესში“, - აღნიშნა მარიამ ჯაშმა.

მისი განცხადებით, საქართველო რამდენიმე წელიწადში იქნება მზად, გაითვალისწინოს მსოფლიო ბანკის რეკომენდაცია და მთლიანი შიდა პროდუქტის სულ მცირე 1 % გამოიყოს მეცნიერებისა და კვლევების განვითარებისთვის.

„მაგრამ პარალელურად უნდა ვიზრუნოთ ხარისხის გაუმჯობესებაზე კვლევების მიმართულებით. შეხვედრაზე ვისაუბრეთ ეკონომიკის დარგებში იმ მიმართულებების შესახებ, რომელიც საინტერესოა საქართველოში პრიორიტეტული ინოვაციების დანერგვის კუთხით. ერთ-ერთი საკითხი, რომელზეც ვიმსჯელეთ, არის ინდუსტრიული დიზაინი. ეს არის სფერო, რომელშიც არაერთი წარმატებული ქართველი მოღვაწეობს უცხოეთში და შესაძლოა სწორედ ეს იყოს ნიშა საქართველოსთვის, რომელიც მიზანმიმართულად განვითარედება. დიდი ინტერესით დაველოდები USAID-ის საკონსულტაციო ვიზიტის რეკომენდაციებს, რათა მთავრობასთან კოორდინაციით მაქსიმალურად დროულად დაინერგოს ყველა შესაბამისი რჩევა, რომელიც ეფექტური იქნება ინოვაციებისა და ტექნოლოგიების განვითარებისთვის საქართველოში“, - განაცხადა მარიამ ჯაშმა.