კახეთის რეგიონში სტიქიის შედეგად დაზარალებული მოსახლეობა მთავრობისგან ფულად კომპენსაციას მიიღებს.  ამის შესახებ პრემიერ-მინისტრმა ვანო მერაბიშვილმა საგანგებო ბრიფინგზე განაცხადა.

მისი თქმით, დაზარალებულები სამ კატეგორიად დაიყოფიან და კომპენსაცია ამის მიხედვით გადანაწილდება.

მერაბიშვილის განმარტებით, პირველ კატეგორიაში მოხვდება ის მოსახლეობა, ვისაც სახლები დაუზიანდა და მოსავალი 100%-ით გაუნადგურდა. მათ 1 300-1 500 ლარამდე კომპენსაცია გადაეცემათ. 

„მეორე კატეგორიაში შევიდა მოსახლეობა, რომლებსაც ნათესების 80% გაუნადგურდა. ისინი კომპენსაციის სახით 800-900 ლარს მიიღებენ, მესამე კატეგორიაზე კი, 300-500 ლარი გაიცემა, აღნიშნულ კატეგორიაში ისინი შედიან, რომლებმაც სასოფლო-სამეურნეო სავარგულების 50% დაკარგეს“ - აღნიშნა მერაბიშვილმა.

პრემიერის თქმით, სტიქიის შედეგების ლიკვიდაციის ღონისძიებები რამდენიმე მიმართულებით წარიმართება. პირველ რიგში აღდგება ყველა დაზიანებული სახურავი. შემდეგ, ადგილობრივებს შხამ-ქიმიკატები გადაეცემათ, ასევე, დაურიგდებათ სასურსათო პაკეტი, რომლის შემადგენლობაშიც შაქარი,ზეთი და ფქვილი შევა.

გარდა ამისა, მერაბიშვილის განცხადებით, ადგილობრივებს ბანკებიდან აღებული კრედიტების გადახდა ერთი წლით გადაუვადდებათ და მათ სესხზე პროცენტი არ დაერიცხებათ.