"თავისუფალი საქართველოს" დედოფლისწყაროს ორგანიზაცია სკანდალურად  გათავისუფლებული ყოფილი პროკურორის სამაშველო განყოფილების უფროსად დანიშვნას აპროტესტებს.
როგორც "ნიუსპრესს" "თავისუფალი საქართველოდან" აცნობეს, 2010 წლის შემოდგომაზე დედოფლისწყაროს პროკურორი დავით დუღაშვილი თანამდებობიდან სკანდალურად გაათავისუფლეს. გათავისუფლება სოფელ ჯაფარიძეში მცხოვრებ ცოლ-ქმრის, ნონა მეხრიშვილის და გია ტალიაშვილის მიერ გადაღებულ ფარულ ჩანაწერს უკავშირდება. ისინი პირად საუბარში აღნიშნავდნენ, რომ დავით დუღაშვილმა მათ ქრთამი მოსთხოვა.
პარტიის ინფორმაციით, დავით დუღაშვილის წინააღმდეგ სისხლის სამართლის საქმე უნდა აღძრულიყო, თუმცა, დუღაშვილი საკრებულოს თავმჯდომარემ სახანძრო დაცვისა და სამაშველო სამსახურის განყოფილების უფროსად დანიშნა. ცოლ-ქმარი კი, თაღლითობის ბრალდებით ციხეში მოხვდა.
"თავისუფალი საქართველოს" დედოფლისწყაროს ორგანიზაციის წარმომადგენლები შესაბამისი ორგანოებისგან, მათ შორის კონტროლის პალატისგან მუნიციპალიტეტის ბიუჯეტის შესწავლას მოითხოვენ.