იუსტიციის მინისტრის თეა წულუკიანის განცხადებით, დასამალი არ არის, რომ ის პროკურორობის კანდიდატის, შალვა თადუმაძის თანამებრძოლი და მისი შვილის ნათლიაა.

მისივე თქმით, იმის გამო, რომ პროკურორობის კანდიდატის არჩევასთან დაკავშირებით საპროკურორო საბჭოს გადაწყვეტილებას ჩრდილი არ მისდგომოდა, კენჭისყრაში მონაწილეობა არ მიიღო.

ამის შესახებ წულუკიანმა მთავარი პროკურორის კანდიდატად შალვა თადუმაძის არჩევის შესახებ, საკითხის კომენტირებისას განაცხადა.


„არ არის დასამალი, რომ კავშირი შალვა თადუმაძესთან მაქვს, მისი თანამებრძოლი და თანამოაზრე ვარ. ასევე ვარ მისი შვილის ნათლია.  დღეს კენჭისყრაში მონაწილეობა არ მივიღე, იმისთვის, რომ კენჭისყრაში ჩემი მონაწილეობით რაიმე ტიპის, თუნდაც მცირე ჩრდილი არ მისდგომოდა ისეთი მაღალი კვალიფიკაციის მქონე ადამიანების გადაწყვეტილებას, როგორიცაა მაგალითად, თემურ მონიავა, ირმა ჭკადუა, პროკურორთა კორპუსის რვა წარმოამდგენელი, ორი მოსამართლე...“- განაცხადა წულუკიანმა.

შეგახსენებთ, შალვა თადუმაძე საპროკურორო საბჭომ პროკურორობის კანდიდატად შეარჩია. მას მხარი საბჭოს 12-მა წევრმა დაუჭირა. ახლა მისი კანდიდატურა მთავრობამ უნდა დაამტკიცოს, საბოლოო გადაწყვეტილებას კი პარლამენტი მიიღებს.