„თეთრების“ ლიდერის თემურ შაშიაშვილის შეფასებით, საქართველოს პრეზიდენტის მიხეილ სააკაშვილის და მისი ხელისუფლების წევრების გამოსვლები პოპულისტურია და ქართველი ხალხისთვის „თვალში ნაცრის შეყრის“ პოლიტიკაა.
ამის შესახებ ნათქვამია „თეთრების“ ლიდერის საგანგებო განცხადებაში, სადაც შაშიაშვილი აცხადებს, რომ ხელისუფლების მხრიდან განხორციელებული ქმედებები და ისტერიულ-აგრესიული ტონი, მოსახლეობის დაშინება-დაშანტაჟების მორიგი მცდელობაა.
„ხელისუფლებამ აბსოლუტურად უკონტროლო გახადა საკუთარი პოლიტიკური ჯიბე და საქართველოს ნებისმიერი მოქალაქის შემოსავალზე განუსაზღვრელი კონტროლი დააწესა, მიზანმიმართულად ხდება წინასაარჩევნო სიტუაციის ესკალაცია, მათ შორის მერეთსა თუ კარალეთში მომხდარი დაპირისპირებები, ბოლო დროინდელი დაყადაღებები, დაპატიმრებები, თავისუფალ მედიაზე ზეწოლა“ - აცხადებს შაშიაშვილი.
მისივე შეფასებით, სოციალურ ქსელებში ხელისუფლების მიერ მართული ჯგუფების შეურაცხმყოფელი და პროვოკაციული მოსაზრებები, პოლიტიკურ თოქ-შოუებში მაღალჩინოსანთა პოპულისტური განცხადებები და მკვეთრად აგრესიული საუბრის ტონი, აშკარად მიუთითებს არჩევნების გასაყალბებლად მათ მზაობაზე.
„სააკაშვილის და მისი ხელსუფლების ნებისმიერი წევრის პოპულისტური გამოსვლა გათვლილია უცხოეთზე და დიპლომატიურ კორპუსზე, ხოლო საკუთარი ხალხისთვის - „თვალში ნაცრის შეყრის“ პოლიტიკაა“ - მიაჩნია „თეთრების“ ლიდერს.