საგარეო საქმეთა მინისტრის მოადგილე ვახტანგ მახარობლიშვილი საქართველოში ოფიციალური ვიზიტით მყოფ ეუთო-ს მონაწილე ქვეყნების მუდმივ წარმომადგენლებს შეხვდა.

საგარეო საქმეთა სამინისტროს პრესსამსახურის ინფორმაციით, შეხვედრისას ქართულმა მხარემ მუდმივ წარმომადგენლებს საქართველოს ტერიტორიული მთლიანობისა და სუვერენიტეტის მტკიცე მხარდაჭერისთვის მადლობა გადაუხადა.

ვახტანგ მახარობლიშვილმა ევროპული უსაფრთხოების სისტემის წინაშე მდგარ გამოწვევებზე და მათზე რეაგირების კუთხით, ეუთო-ს, როგორც უსაფრთხოების ყველაზე დიდი რეგიონული ორგანიზაციის მნიშვნელობაზე ისაუბრა.

ამ კონტექსტში საგარეო საქმეთა მინისტრის მოადგილემ, ასევე, რუსეთ-საქართველოს კონფლიქტის მშვიდობიანი მოგვარების აუცილებლობასა დააღნიშნული კონფლიქტის ეუთო-ს დღის წესრიგში მაღალ დონეზე შენარჩუნების მნიშვნელობაზე ისაუბრა. ქართულმა მხარემ სტუმრებს ჟენევის საერთაშორისო დისკუსიებისა და საქართველოს მთავრობის სამშვიდობო ინიციატივის შესახებ გააცნო ინფორმაცია.

შეხვედრაზე აფხაზეთისა და ცხინვალის ოკუპირებულ რეგიონებში ადამიანის უფლებებისა და ჰუმანიტარული კუთხით შექმნილ მძიმე ვითარებაზე ისაუბრეს. ყურადღება გამახვილდა არჩილ ტატუნაშვილის სიცოცხლის ხელყოფის ფაქტზე. აღინიშნა, რომ არსებული რთული ვითარების პირობებში, საერთაშორისო მონიტორინგის მექანიზმებს საოკუპაციო ძალა არ აძლევს ადგილზე მონიტორინგის განხორციელების საშუალებას.

შეხვედრისას საუბარი, ასევე, შეეხო ქვეყანაში განხორციელებულ დემოკრატიულ რეფორმებსა და ამ პროცესში ეუთო-ს დამოუკიდებელ ინსტიტუტებთან წარმატებულ თანამშრომლობას.