პოლიტიკური კოალიცია „ქართული ოცნების“ ერთ-ერთი ლიდერის ირაკლი ალასანიას განცხადებით, საზოგადოებრივი  მოძრაობა „ეროვნულების“ წევრები საზოგადოებრივი მოძრაობა „ქართული ოცნების“ თემატურ ჯგუფებში ჩაერთვებიან.

ამის შესახებ ალასანიამ მოძრაობის წარმომადგენლებთან შეხვედრის დასრულების შემდეგ განაცხადა.

„დღევანდელ შეხვედრაზე საზოგადოებრივ მოძრაობებს - „ეროვნულებსა“ და „ქართულ ოცნებას“ შორის შეთანხმება შედგა იდეური გაერთიანების შესახებ, რაც პოლიტიკური და საზოგადოებრივი პროცესებისთვის მნიშვნელოვანია“ - აღნიშნა ალასანიამ.

მისივე თქმით, დღევანდელი შეხვედრა საფუძველია იმისა, რომ საქართველოში სამოქალაქო თანხმობა შედგეს.

„ეს ადამიანები არიან პირველი დემოკრატიულად არჩეული მრავალპარტიული პარლამენტის წარმომადგენლები, რომლებთანაც საუბარი გვქონდა თუ როგორ უნდა შევქმნათ ოცი წლის შემდეგ შესაძლებლობა, რომ მოქალაქეებს ზეწოლის გარეშე შეეძლოთ პარლამენტის არჩევა“ - აღნიშნა ალასანიამ.

მისივე შეფასებით, აუცილებელია 90-იან წლების დასაწყისში სახელმწიფო გადატრიალების დროს მომხდარი სამოქალაქო დაპირისპირებით სამართლებრივი წყვეტის აღდგენა.