რეგიონული პოლიტიკისა და თვითმმართველობის კომიტეტის თავმჯდომარემ ზაზა გაბუნიამ „რეგიონულ მაუწყებელთა ალიანსის“ დირექტორთა საბჭოს წევრთან, ნათია კუპრაშვილთან, ასევე „სტუდია რეს“ წარმომადგენლებთან შეხვედრა გამართა.



შეხვედრაზე განსაკუთრებული ყურადღება გამახვილდა რეგიონული მედიის მნიშვნელობასა და მის პოპულარიზაციაზე.



რეგიონული მედიის წარმომადგენლებმა კომიტეტის თავმჯდომარეს ის პროექტები გააცნეს, რა მიმართულებითაც ორგანიზაციები მუშაობენ.



ნათია კუპრაშვილის განცხადებით, „რეგიონულ მაუწყებელთა ალიანსი“ მიზნად ისახავს რეგიონული მედიის განვითარების გზით, რეგიონში მცხოვრები აუდიტორიისთვის ხარისხიანი და შინაარსიანი აუდიო-ვიზუალური პროდუქტის მიწოდებას, მოსახლეობის ინფორმირებას, განათლებას, განვითარებას.



შეხვედრაზე კომიტეტის თავმჯდომარემ ყურადღება გაამახვილა, კომიტეტის გრძელვადიან სტრატეგიაზე და გამოთქვა მჭიდრო თანამშრომლობის სურვილი რეგიონული მედიის წარმომადგენლებთან.



„კომიტეტი განსაზღვრავს პოლიტიკას რეგიონებისა და თვითმმართველობების მიმართულებით, ამდენად, ჩვენთვის მნიშვნელოვანია გვქონდეს აქტიური და მჭიდრო თანამშრომლობა იმ ორგანიზაციებთან, რომლებიც ახდენენ რეგიონში მცხოვრები მოსახლეობის სწორ ინფორმირებას“, - განაცხადა ზაზა გაბუნიამ.



როგორც „სტუდია რეს“ პროდიუსერმა ნინო გელაშვილმა აღნიშნა, „სტუდია რე” ხელს უწყობს საქართველოში დემოკრატიული სახელმწიფოს მშენებლობასა და სამოქალაქო საზოგადოების ჩამოყალიბებას.



ზაზა გაბუნია - „ჩვენ ისედაც ვგეგმავთ კომიტეტის ფორმატში რეგიონულ მედიასთან შეხვედრებს, სადაც უფრო დეტალურად ვისაუბრებთ თვითმმართველობაში მიმდინარე რეფორმებზე“.



შეხვედრის დასასრულს, მხარეები შეთანხმდნენ, რომ გააგრძელებენ აქტიურ თანამშრომლობას მუნიციპალიტეტებთან დაკავშირებულ ყველა აქტუალურ საკითხზე და ასეთი ტიპის თანამშრომლობა იქნება ძალიან ნაყოფიერი და ღირებული.