პარტია „მომავალი საქართველო“ ოქტომბერში დაგეგმილ საპარლამენტო არჩევნებში მონაწილეობას მიიღებს.   ამის შესახებ პარტიის ლიდერმა გიორგი ლაღიძემ დღეს გამართულ პრესკონფერენციაზე განაცხადა.

მისი თქმით, პარტიას ყველა რაიონში მაჟორიტარი დაპუტატობის კანდიდატი ეყოლება. გარდაბნის რაიონის მაჟორიტარი დეპუტატობის კანდიდატი კი - თავად იქნება.

ლაღიძის თქმით, პარტიას საარჩევნო კამპანია პრაქტიკულად დაწყებული აქვს.

„აქტიურად ვმუშაობთ ყველა სოციალურ თემატიკასთან დაკავშირებით და ეს მარტო წინასაარჩევნოდ არ კეთდება. ყველაფერს გავაკეთებთ იმისთვის, რომ საპარლამენტო არჩევნებზე სერიოზული შედეგები მივიღოთ“ - განაცხადა ლაღიძემ.

მისი თქმით, სხვადასხვა პოლიტიკურ ძალებთან კონსულტაციები მიმდინარეობს და არ არის გამორიცხული გარკვეული გაერთიანებებიც შედგეს.

ლაღიძის განცხადებით, უახლოეს მომავალში პარტია წინასაარჩევნო პროგრამას წარადგენს, სადაც მნიშვნელოვანი ყურადღება უმუშევრობას, მწვავე სოაციალურ-ეკონომიკურ პრობლემებს, სოფლის მეურნეობის განვითარებას, ინფრასტრუქტურას და სხვა საკითხებს დაეთმობა.

რაც შეეხება მაჟორიტარი დეპუტატობის კანდიდატებს, ლაღიძის თქმით, ისინი სხვადასხვა რაიონებში მოსახლეობასთან შეხვედრებზე დასახელდებიან.