არქეოლოგიური კვლევის შედეგად, ხაშურის მუნიციპალიტეტის სოფელ ნაცარგორაში ძველი წელთაღრიცხვის მესამე ათასწლეულის საცხოვრებელი და სამეურნეო კომპლექსი აღმოაჩინეს.
არქეოლოგიური გათხრები, ერთობლივი პროექტის ფარგლებში, საქართველოს ეროვნულმა მუზეუმმა და ვენეციის კა-ფოსკარის უნივერსიტეტის საერთაშორისო ექსპედიციამ ჩაატარა.
როგორც „ნიუსპრესს“ ეროვნული მუზეუმიდან აცნობეს, ნაცარგორაზე არქეოლოგიურ სამუშაოებს, ალექსანდრე რამიშვილის ხელმძღვანელობით არქეოლოგიური კვლევის ცენტრის ექსპედიაცია გასული საუკუნის 80-იან წლებში აწარმოებდა.
მაშინდელმა აღმოჩენებმა ცხადყო, რომ ეს ადგილი მრავალფენიანი ნასახლარი ძეგლია, სადაც ერთდროულად ორი, მტკვარ-არაქსის და ბედენური კულტურის ნიმუშები გამოვლინდა.
პროექტის ფარგლებში, არქეოლოგიური კვლევა-ძიება ახალი მეთოდებით გაგრძელდა. აღმოჩენილია ადრე ბრინჯაოს ხანის საცხოვრებელი და სამეურნეო კომპლექსი, სამუშაო და სამეურნეო იარაღები. აღმოჩენილი მასალა ახლებურად დამუშავდა.
პროექტი, არქეოლოგიური სამუშაოების გარდა, 80-იან წლებში აღმოჩენილი მასალის კვლევასა და გამოქვეყნებას ითვალისწინებს.
პროექტში ქართველ და უცხოელ მკვლვარებთან ერთად ივანე ჯავახიშვილის სახელობის უნივერსიტეტის სტუდენტებიც არიან ჩართული.