არჩილ ტატუნაშვილის მკვლელობის შემდეგ პრაღაში პრემიერის სპეციალური წარმომადგენლის, ზურაბ აბაშიძისა და რუსეთის საგარეო საქმეთა მინისტრის მოადგილის გრიგორი კარასინის შეხვედრა პირველად გაიმართება.
შეხვედრა დღეს, 24 მაისს შედგება.
აბაშიძის განცხადებით, შეხვედრაზე საუბარი სავაჭრო ეკონომიკურ ურთიერთობებს, სატრანსპორტო პრობლემატიკასა და სხვა ჰუმანიტარულ საკითხებს შეეხება.

„ჩვენ გვაქვს ჩვენი დღის წესრიგი, რომელიც ჯერ კიდევ 2013 წლიდან გამოიკვეთა. ეს არის სავაჭრო ეკონომიკური ურთიერთობები, სატრანსპორტო პრობლემატიკა და გარკვეული ჰუმანიტარული საკითხები, ამაზე ვიმსჯელებთ. მე ჩემი მხრიდან ყოველთვის ვაკეთებ ხოლმე იმ მწვავე საკითხებზე განცხადებას, რაც ჩვენ ყველაზე უფრო გვაწუხებს და ეს არის ოკუპირებულ ტერიტორიებთან დაკავშირებული, ეს იქნება ტატუნაშვილის საქმე, ოთხოზორიას მკვლელობა. ამას ჩემი ინიციატივით ვაკეთებ, თუმცა ვიმეორებ, ამას ჩემი ინიციატივით ვაკეთებ. არ არის ეს ჩვენი მანდატი, ამაზე ჟენევის ფარგლებში საუბრობენ უფრო საგნობრივად“-განაცხადა ზურაბ აბაშიძემ ტელეკომპანია „რუსთავი 2“-თან საუბრისას.