რუსეთი განაგრძობს საქართველოს ოკუპირებული ტერიტორიების ინტენსიურ მილიტარიზაციას, იქ განლაგებული საოკუპაციო ძალების გადაიარაღებას უახლესი სამხედრო  ტექნიკით, მათ შორის შეტევითი სარაკეტო შეიარაღების განლაგებას და დამრტყმელი სამხედრო დაჯგუფებების ფორმირებას - ამის შესახებ აღნიშნულია საქართველოს საგარეო საქმეთა სამინისტროს განცხადებაში.

საგარეო პოლიტიკური უწყება მიიჩნევს, რომ რუსეთი სამხედრო საფრთხეს უქმნის მშვიდობასა და სტაბილურობას საქართველოსა და მთლიანად შავი ზღვის რეგიონში.

„სულ უფრო ნათელი ხდება, რომ რუსეთის ფედერაციის სათავეში მყოფ რეჟიმს არაფერი არა აქვს შესათავაზებელი კავკასიისათვის გარდა კრიმინალურ-მაფიოზური მმართველობისა და მილიტარიზაციისა“ - აღნიშნულია განცხადებაში.

ამასთანავე, განცხადებაში ნათქვამია, რომ ეს რეალობა სერიოზული განსჯის საგანი უნდა გახდეს კავკასიის სახელმწიფოებისთვის, კავკასიის ხალხებისა და საერთაშორისო საზოგადოებრიობისთვის.

სამინისტროს განცხადებით, 11 და 13 ივლისს რუსეთის ფედერაციის სახმელეთო ჯარების სარდალი გენერალ-პოლკოვნიკი ვლადიმერ ჩირკინი, საქართველოს სახელმწიფო საზღვრის დარღვევით, ოკუპირებულ ცხინვალის რეგიონსა და აფხაზეთში ჩავიდა, სადაც „ინსპექტირების" მიზნით მოინახულა რუსეთის საოკუპაციო ძალების ე.წ. ბაზები და შეხვედრები გამართა საოკუპაციო რეჟიმების წარმომადგენლებთან.

სამინისტროში მიიჩნევენ, რომ 2008 წლის სცენარით მიმდინარეობს გამუდმებული სამხედრო წრთვნები როგორც საქართველოს ოკუპირებულ რეგიონებში, ასევე სახელმწიფო საზღვრის მთელ პერიმეტრზე და სექტემბერში დაგეგმილი სტრატეგიული სამხედრო სწავლებები „კავკასია-2012".