კამპანია „ეს შენ გეხებას“ მონაწილე არასამთავრობო და მედია ორგანიზაციები პოლიტიკურ პარტიებს დიალოგისა და შეთანხმებისკენ მოუწოდებენ.
კამპანიაში მიაჩნიათ, რომ გარკვეული შეთანხმების მიღწევა პარტიებს შორის სამართლიანი კონკურენტული და მშვიდობიანი არჩევნების ჩატარებას შეუწყობს ხელს.
კამპანიის მონაწილე არასამთავრობო ორგანიზაციების წარმომადგენლები აცხადებენ, რომ „ნაციონალური მოძრაობის“ მიერ შეთავაზებული თანამშრომლობის პრინციპი საკმარისი არ არის პროცესების რეალურად გაჯანსაღებისთვის და საჭიროა, რომ როგორც ხელისუფლებამ ისე, პოლიტიკურმა პარტიებმა მეტი პასუხისმგებლობა აიღონ და სხვადასხვა მნიშვნელოვან თემებზე შეთანხმდნენ.
კამპანიაში შემავალ ორგანიზაციებს მიაჩნიათ, რომ პოლიტიკურმა პარტიებმა არ უნდა დაუშვან მომხრეთა მხრიდან აგრესიული და დესტრუქციული ქმედებების განხორციელება ან წახალისება, არ დაუშვან მიუკერძოებელი სადამკვირვებლო ორგანიზაციების საქმიანობაში ჩარევა და მათი დისკრედიტაციის მცდელობა, ასევე, არ უნდა მოისყიდონ ამომრჩევლი და დაიცვან საარჩევნო კანონმდებლობით დადგენილი მოთხოვნები.
ასევე, კამპანიის მონაწილეები აცხადებენ, რომ პოლიტიკურმა პარტიებმა არ უნდა დაუშვან ადმინისტრაციული რესურსის ბოროტად გამოყენება, მათ შორის საბიუჯეტო რესურსების, უნდა უზრუნველყონ საკუთარ ღონისძიებებზე ყველა მედია საშუალების თანაბარი სამუშაო პირობები, არ დაუშვან ჟურნალისტებზე ზეწოლისა და მათ საქმიანობაში ხელის შეშლის ფაქტები. ასევე, ხელი შეუწყონ მედიასაშუალებებს შორის არსებული დაპირისპირების და დაძაბულობის განმუხტვას.
კამპანია „ეს შენ გეხებას“ წარმომადგენელთა განმარტებით, სახელმწიფო უწყებებმა თავის მხრივ უნდა იმოქმედონ პოლიტიკური ნეიტრალიტეტის სრული დაცვით, უზრუნველყონ თანაბარი და სამართლიანი მიდგომა სხვადასხვა პოლიტიკური სუბიეტქების მიმართ, ხოლო სახელმწიფო აუდიტის სამსახურმა უზრუნველყოს კანონდებლობით დაკისრებული ფუნქციების ისე განხორციელება, რომელიც დისკრიმინაციულად არ შეზღუდავს ცალკეული პოლიტიკური პარტიების ფინანსურ საქმიანობას. ასევე, მეტი აქცენტი გააკეთოს დარღვევების პრევენციაზე ვიდრე დამრღვევთა დასჯაზე.
როგორც კამპანია „ეს შენ გეხებას“ მონაწილემ თამარ ჩუგოშვილმა განაცხადა, აღნიშნულ საკითხებზე შეთანხმება დროულად და მხარეების მაქსიმალური ჩართულობით უნდა მოხდეს, ხოლო შეთანხმების პრინციპები მხოლოდ ერთი პოლიტიკური ძალის მხრიდან არ უნდა იყოს ნაკარნახევი.
კამპანიის მონაწილეები გამოთქვამენ მზადყოფნას, რომ პარტიებს შორის შეთანხმების პროცესში მედიატორის როლი შეასრულონ.