საქართველოს პრეზიდენტმა „ლიბერთი ბანკის“ ხელმძღვანელობა სადაზღვევო პოლისებისა და პენსიების დარიგების  პროცესში წარმოქნილი რიგების გამო გააკრიტიკა.
მიხეილ სააკაშვილი ბათუმში პოლისების დარიგების პროცესს თავად დაესწრო და განაცხდა, რომ ბანკი მოსახლეობას დაბალი დონის მომსახურებას უწევს და თუ სერვისის გაუმჯობესება არ მოხდება, დარიგების პროცესში სხვა ბანკები ჩაერთვებიან.
„დილის 7 საათიდან პაპანაქება სიცხეში ხალხი რიგში დგას. ეს დაცინვაა. კიდევ ერთხელ სადმე ვნახავ ასეთ შემთხვევას და საერთოდ ჩამოვართმევთ ბანკს პოლისებისა და პენსიების დარიგების უფლებას. ვპირდები საქართველოს მოსახლეობას, რომ დღეიდან არცერთ საპენსიო განყოფილებაში ხალხი რიგში აღარ ჩადგება და თუკი ჩადგება, პენსიების გაცემის უფლებას იმ ბანკს გადავცემთ, რომელიც ამას რიგში ჩაყენების, გაზულუქების და ხალხის თავზე წამოჯდომის გარეშე განახორციელებს“ - განაცხადა სააკაშვილმა და აღნიშნა, რომ პენსია იმაზე გაცილებით ნაკლებია, ვიდრე ხალხს რეალურად ეკუთვნის.
მისი თქმით, პოლისები იმისთვის შეიქმნა, რომ ხალხს ჯანდაცვის ხელმისაწვდომობაზე პრობლემები არ ჰქონდეთ. პრეზიდენტმა დასძინა, რომ მთავრობის განახლებულ შემადგენლობას თითეულ ოჯახთან ინდივიდუალური ხელშეკრულებების გაფორმება სთხოვა, რათა ხალხმა იცოდეს, რას მიიღებს 4 წლის განმავლობაში.
„თქვენ ხელში გეჭირებათ დოკუმენტი, რომლითაც ვერავინ გაცდევინებთ გარეთ და ვერ გაიძულებთ, რომ კართან აიტუზოთ. მეორედ აღარ უნდა დავინახო ასეთი რამ, თორემ შევქმნით მექანიზმს და დღეს საქართველოში თუ სადმე რიგია, ყველას მოვთხოვთ პასუხს“- განაცხადა სააკაშვილმა.