თბილისის საკრებულოს „ქრისტიან-დემოკრატი“ წევრი ზაზა გაბუნია დღეს, ისნის რაიონში წყალდიდობის შედეგად  დაზარალებულებს შეხვდა.
როგორც „ნიუსპრესს“ „ქრისტიან-დემოკრატებიდან“ აცნობეს, გაბუნია აბუსერიძე-ტბელის ქუჩაზე მცხოვრებ ხუსკივაძეების, მიქაძეების და ალიევების ოჯახში იმყოფებოდა და სიტუაციას ადგილზე გაეცნო.
მისი თქმით, საგანგაშო ფაქტია, რომ XXI საუკუნის ურბანულ, საქალაქო დასახლებაში მოქალაქეები წვიმის მოსვლას შიშით ხვდებიან.
„ამის უმთავრესი მიზეზი ის გახლავთ, რომ ქალაქის ხელისუფლება წლების განმავლობაში სანიაღვრე ქსელებთან და სადრენაჟე სისტემებთან დაკავშირებული პრობლემების მოგვარებას ვერ ახერხებს. შედეგად, ამ სისტემების გარეშე დარჩენილი დასახლებების მოსახლეობის მნიშვნელოვანი ნაწილის საცხოვრებელი სახლები ავარიულ და ამორტიზებულ მდგომარეობამდეა მისული“ - განაცხადა გაბუნიამ.
ის ისნის მაჟორიტარ დეპუტატსა და გამგებელს პრობლემის მოგვარებისთვის სამუშაოების დაწყებისკენ მოუწოდებს.