„ქრისტიან–დემოკრატების“ ერთ-ერთი ლიდერის ლევან ვეფხვაძის შეფასებით, NDI-ს კვლევებმა აჩვენა, რომ „ქრისტიან–დემოკრატიულ მოძრაობას“  ქვეყანაში მყარი მხარდაჭერა აქვს.
ამის შესახებ ვეფხვაძემ NDI-ს მიერ პარტიების რეიტინგებზე ჩატარებული კვლევების შეფასებისას განაცხადა.
მისი შეფასებით, კვლევებმა კიდევ ერთხელ აჩვენა, რომ ივნისის პირველ ნახევარში, პოლარიზების და ეიფორიების პიკში, „ქრისტიან–დემოკრატებისგან“ განსხვავებით, სხვა ოპოზიციური პარტიები ელექტორატის გარეშე დარჩნენ.
„ჩვენ მყარი მხარდაჭერა გვაქვს, იმიტომ, რომ „ქრისტიან–დემოკრატებს“ პოლიტიკურ პარტიებს შორის ყველაზე მაღალი მეორე არჩევანი გვაქვს. პირველი და მეორე არჩევანი ჯამში 10–12%–მდე აღწევს“– განაცხადა ვეფხვაძემ.
მისივე თქმით, გასათვალისწინებელია ის ამომრჩეველიც, რომელსაც გადაწყვეტილება ჯერ არ მიუღია.
ამერიკის ეროვნულ–დემოკრატიული ინსტიტუტის პარტიების რეიტინგების კვლევების თანახმად, გამოკითხულთა 36%, ხვალ რომ საპარლამენტო არჩევნები იყოს, ხმას „ნაციონალურ მოძრაობას“ მისცემდა, 18% - „ქართულ ოცნებას“, ხოლო 3% - „ქრისტიან-დემოკრატიულ მოძრაობას“.
გამოკითხვა 4–დან 22 ივლისს ჩატარდა. მასში მონაწილება საქართველოს მასშტაბით 6 000 ადამიანზე მეტმა მიიღო.