საქართველოს პარლამენტის თავმჯდომარის, ირაკლი კობახიძის განცხადებით, „Freedom House”-ის მიერ ანგარიშში მოყვანილი მცდარი ფაქტების გასწორება კიდევ ერთხელ მიუთითებს იმაზე, რომ სწორი იყო ამ ანგარიშის გაკრიტიკება და ამ უზუსტობებსა და შეცდომებზე მითითება.

ირაკლი კობახიძის აზრით, შეცდომები „Freedom House”-ის ბრალი არ არის და არასწორი დასკვნა მიწოდებული მიკერძოებული ინფორმაციის საფუძველზე ჩამოყალიბდა.



„ჩვენ ვამბობდით, რომ იყო არაერთი, პრაქტიკულად, ათეულობით შეცდომა. იყო ფაქტობრივი შეცდომები “Freedom House”-ის ანგარიშში, ამაზე ჩვენ გავამახვილეთ ყურადღება და ძალიან კარგია, რომ თანდათანობით ხდება ამ შეცდომების აღიარება. ეს არ არის, მე ვფიქრობ, Freedom House”-ის ბრალი, ეს არის იმ მიკერძოებული ორგანიზაციების და იმ მიკერძოებული სუბიექტების ბრალი, რომლებიც აწვდიან არასწორ ინფორმაციას „Freedom House”-ს: ეს არის მთელი რიგი არასამთავრობო ორგანიზაციები საქართველოში, ეს არის, მათ შორის, საქართველოს პრეზიდენტი, რომლის ინფორმაციასაც ეფუძნებოდა „Freedom House”-ის ანგარიში. სამწუხაროდ, ამ მიკერძოებული ინფორმაციის საფუძველზე, ჩამოყალიბდა არასწორი დასკვნა მთელი რიგი ხარვეზებით, ფაქტობრივი უზუსტობებით და ძალიან კარგია, რომ ეს უზუსტობები სწორდება, ძალიან კარგია, რომ ყურადღება გამახვილდა ამ ყველაფერზე. ეს ყველაფერი მიუთითებს კიდევ ერთხელ იმაზე, რომ სწორი იყო ჩვენი მხრიდან ამ ანგარიშის გაკრიტიკება და ამ უზუსტობებზე და შეცდომებზე მითითება“,- განაცხადა საქართველოს პარლამენტის თავმჯდომარემ.