ლიტვის რესპუბლიკაში საქართველოს საელჩოს ორგანიზებით, საქართველოს პირველი დემოკრატიული რესპუბლიკის დაარსების 100 წლისთავისადმი მიძღვნილ ღონისძიებათა ფარგლებში, ვილნიუსის დიდ მთავართა სასახლეში სახელწოდებით „საქართველოს პირველი დემოკრატიული რესპუბლიკა: ლიტვა-საქართველოს მეგობრობის ასი წელი“ საზეიმო მიღება გაიმართა.

მოწვეულ სტუმრებს ლიტვის რესპუბლიკაში საქართველოს საგანგებო და სრულუფლებიანმა ელჩმა ხათუნა სალუქვაძემ სიტყვით მიმართა, რომელმაც საქართველოს პირველი დემოკრატიული რესპუბლიკის ასი წლის იუბილის შესახებ ისაუბრა და 1918 წელს, საქართველოს რესპუბლიკის დაარსებისა და ლიტვის სახელმწიფოებრიობის აღდგენის შემდგომ, ორ ქვეყანას შორის კავშირების ჩამოყალიბების მნიშვნელობას გაუსვა ხაზი. ელჩმა ასევე ისაუბრა პირველი დემოკრატიული რესპუბლიკის მიღწევების შესახებ და ხაზი გაუსვა იმ ნაბიჯებს, რომლებიც საქართველოს სახელმწიფომ მე-20 საუკუნის დასაწყისში გადადგა დემოკრატიული ღირებულებების დასამკვიდრებლად. ასევე, განსაკუთრებული ხაზგასმით აღინიშნა ლიტვის მხარის მიერ მიღებული გადაწყვეტილება ლიტვურ ენაში საქართველოს ავთენტური დასახელება Sakartvelo-ს დამკვიდრების თაობაზე.



ლიტვის რესპუბლიკის სახელით, საქართველოს პირველი დემოკრატიული რესპუბლიკის ასი წლის იუბილე მიულოცა ლიტვის სეიმის თავმჯდომარემ:

„ვულოცავ თქვენს ქვეყანას. ვულოცავ საქართველოს და ხუთ მილიონ საქართველოს მოქალაქეს! ჩვენ ლიტველები დღეიდან, თქვენს ქვეყანას ვუწოდებთ „საქართველოს“, თქვენ კი „ქართველებს“.ამავდროულად ჩვენ მოხარულნი ვართ, რომ წელს, საქართველოს დამოუკიდებლობის და პირველი დემოკრატიული რესპუბლიკის მეასე წლისთავის იუბილესთან ერთად, ლიტვაც აღნიშნავს სახელმწიფოებრიობის აღდგენის მეასე წლისთავს.ჩვენ თქვენს გვერდით ვართ!“

საზეიმო მიღებაზე წარმოდგენილი იყო საქართველოს პირველი დემოკრატიული რესპუბლიკისა და ლიტვის რესპუბლიკის ურთიერთობათა ამსახველი გამოფენა "საქართველოს პირველი დემოკრატიული რესპუბლიკა: საქართველო-ლიტვის მეგობრობის 100 წელი“.



ღონისძიების ფარგლებში, მოეწყო ფოტოგამოფენები „საქართველო-ლიტვის ისტორიული კავშირები (1495-1497)“, „ქართული ეროვნული კოსტუმი ევროპულ ოჯახში“, „ქართული დამწერლობა და ხელნაწერები“, „ქართული ანბანის სამი სახეობა“, „მემკვიდრეობა ოკუპაციის ქვეშ - აფხაზეთი“, „50 ქალი საქართველოდან“ და დიმიტრი ერმაკოვის ფოტომასალები.



ღონისძიებაში მონაწილეობდნენ დამოუკიდებელი ლიტვის სახელმწიფოს პირველი მეთაური ვიტაუტას ლანდსბერგისი, ლიტვის ხელისუფლენის წარმომადგენლები, ვილნიუსში აკრედიტებული დიპლომატები, კულტურისა და აკადემიური წრეების მოღვაწეები და ქართული დიასპორის წარმომადგენლები.



მიწვეული სტუმრების წინაშე ქართული ხალხური სიმღერების ფართო რეპერტუარით წარსდგა თბილისის ოპერისა და ბალეტის სახელმწიფო თეატრთან არსებული ანსამბლი „სულიკო“. ღონისძიების დასასრულს, გაიმართა ქართული სამზარეულოს პრეზენტაცია და ქართული ღვინის დეგუსტაცია.



ლიტვის რესპუბლიკაში გრძელდება საქართველოს პირველი დემოკრატიული რესპუბლიკის დაარსების ასი წლისთავის აღსანიშნავი ღონისძიებები.