ლისაბონში, პორტუგალიის პარლამენტის ორგანიზებით და ეუთოს საპარლამენტო ასამბლეის მხარდაჭერით, თემაზე „დემოკრატიული სახელმწიფოს ციფრული მდგრადობა“ საერთაშორისო კონფერენცია გაიმართა. პოლიტიკოსების, ექსპერტების, ჟურნალისტების, ეუთოს ინსტიტუტების და ასევე სხვადასხვა საერთაშორისო ორგანიზაციის მონაწილეობით გამართულ კონფერენციაზე, განხილვის მთავარ თემებს ისეთი საკითხები წარმოადგენდა როგორიცაა: საარჩევნო სისტემების მოწყვლადობა, კიბერსივრცის ტექნოლოგიური გამოწვევები, სუვერენიტეტი და ციფრული უსაფრთხოება და კიბერ-ტერორიზმის საფრთხე.



ჰიბრიდულ საფრთხეებზე, კიბერდანაშაულებზე და მათ წინააღმდეგ ბრძოლის მნიშვნელობაზე, კონფერენციაზე ვრცელი მოხსენებით ეუთოს საპარლამენტო ასამბლეის პრეზიდენტი, საქართველოს პარლამენტის წევრი, გიგი წერეთელი წარსდგა.



„ჩვენს სამყაროში, შეიარაღებული კონფლიქტი არ არის ერთადერთი საფუძველი, რომელიც საფრთხეს უქმნის სახელმწიფოებს და მათ მოქალაქეებს. კიბერსივრცეში ჩვენ ვხედავთ ახალ გამოწვევებს, სადაც ექსტრემისტებს და დამნაშავეებს ინტერნეტი შესაძლებლობებს აძლევს განახორციელონ ისეთი დანაშაულები როგორიცაა ბავშვთა სექსუალური ექსპლუატაცია, ტერორისტული ქმედებები, პირადი მონაცემების გამოყენებით საბანკო ანგარიშებზე ხელმისაწვდომობა და სხვისი ქონების მითვისება“, - განაცხადა გიგი წერეთელმა.



ჩრდილოეთ ამერიკის, ევროპის და ცენტრალური აზიის ქვეყნების წარმომადგენლები კონფერენციაზე შეთანხმდნენ, რომ კიბერუსაფრთხოების რისკები მრავალმხრივ და კომპლექსურ მიდგომას საჭიროებენ. მათივე შეფასებით, არსებული სამართლებრივი ჩარჩოების გადახედვა და მათი საერთაშორისო სამართლის პრინციპებთან ჰარმონიზაცია უნდა განხორციელდეს, რათა ქვეყნებმა კიბერუსაფრთხოების კუთხით თანამშრომლობა გააძლიერონ და პრევენციის ეფექტური მექანიზმები დანერგონ.