ღია და გამჭირვალე მმართველობის მუდმივმოქმედი საპარლამენტო საბჭოს წევრები ირინა ფრუიძე, ეკა ბესელია და ოთარ კახიძე დღეს მაროკოს სამეფოს პარლამენტის დელეგაციის წევრებს შეხვდნენ.

სტუმრების ინფორმაციით, მაროკო ღია და გამჭვირვალე მმართველობის კონცეფციას ოფიციალურად ახლახან შეუერთდა, თუმცა 2012 წლის შემდეგ ამ მიმართულებით ქვეყნის მთავრობისა და პარლამენტის მიერ მრავალრიცხოვანი აქტივობები განხორციელდა. დელეგაციის წევრებმა საქართველოს პარლამენტის გამოცდილების გაზიარების სურვილი გამოთქვეს.



საპარლამენტო საბჭოს თავმჯდომარემ, ირინა ფრუიძემ სტუმრებს საქართველოს პარლამენტის სტრუქტურა და ფუნქციები გააცნო, მან ასევე ისაუბრა საპარლამენტო საბჭოს გეგმებსა და ხედვებზე. „მოხარულები ვართ, რომ გვეძლევა შესაძლებლობა, ვისაუბროთ თქვენთან OGP-ის შესახებ, საქართველოს პარლამენტის ღიაობის შესახებ და იმ გამოცდილების თაობაზე, რომელიც საქართველოს გააჩნია ღია მმართველობის მიმართულებით. ძალიან მიხარია, რომ ამ ზაფხულს OGP-ის სამიტზე, რომელიც თბილისში ჩატარდება, მაროკო OGP-ის პარტნიორი ქვეყანა გახდება“, - განაცხადა ირინა ფრუიძემ.

იურიდიულ საკითხთა კომიტეტის თავმჯდომარის, ეკა ბესელიამ OGP-ის წევრობა მიულოცა სტუმრებს. მისი განცხადებით, საქართველო, როგორც OGP-ის თავმჯდომარე ქვეყანა, შეიძლება იყოს მაგალითი სხვა წევრი ქვეყნებისთვის. „მე გამოვარჩევდი ამ საბჭოს თავისი აქტიურობით, ახალი ხედვით, თამამი და პროგრესული გადაწყვეტილებებით. პარლამენტმა მიიღო კონსტიტუციური ცვლილებები, რომლითაც საქართველო ძლიერი საპარლამენტო მოდელის ქვეყანა გახდა. ამჟამად ვმუშაობთ საქართველოს პარლამენტის რეგლამენტის ცვლილებებზე. ეს არის კანონის ძალის მქონე მნიშვნელოვანი დოკუმენტი, რომელიც შესაძლებლობას მისცემს პარლამენტს, ჰქონდეს უფრო ძლიერი მექანიზმები და ინსტრუმენტები, რომ აკონტროლოს მის მიერ მიღებული კანონები“, - განაცხადა ეკა ბესელიამ. მან, ასევე, ისაუბრა იმ სიახლეებზე, რომელიც პარლამენტმა OGP-ის ფარგლებში განახორციელა.


სტუმრებს საპარლამენტო უმცირესობის სახელით მიესალმა ოთარ კახიძე. მისი თქმით, ღია მმართველობაში მოიაზრება მეტი გამჭვირვალობა. „ამ კუთხით ყველაზე საინტერესო გამოცდილება აქვს იუსტიციის სახლებს, რომელიც საშუალებას აძლევს მოქალაქეებს მოკლე დროში მიიღონ თითქმის ყველა სერვისი. ასევე საყურადღებოა სახელმწიფო შესყიდვების გამჭვირვალობა, საჯარო ფინანსების განკარგვის გამჭვირვალობა“, -განაცხადა ოთარ კახიძემ. მან ყურადღება გაამახვილა სამოქალაქო საზოგადოების ჩართულობის გაძლიერებაზე, რომელიც ღია მმართველობის ერთ-ერთი მნიშვნელოვანი პრინციპია.