პოლიტიკური კოალიცია „ქართული ოცნების“ გორის მაჟორიტარი დეპუტატობის კანდიდატი სოსო ვახტანგიშვილი საკუთარ საარჩევნო პროგრამას საზოგადოებას რამდენიმე დღეში გააცნობს.

ამის შესახებ ვახტანგიშვილმა ჟურნალისტებს გორში, მაჟორიტარ კანდიდატად წარდგენის შემდეგ განუცხადა.

მისი თქმით, შიდა ქართლში ძირითადი პრიორიტეტები კონფლიქტების მოგვარება და სოფლის მეურნეობის სფეროს განვითარებაა, თუმცა, ყველა რაიონს თავისი სპეციფიკიდან გამომდინარე, ცალკე საარჩევნო პროგრამა ექნება.

„შეუძლებელია საარჩევნო პროგრამის ორ წუთში ჩატევა, ამიტომ საზოგადოებას მას უახლოეს მომავალში სრულად გავაცნობთ“ -აცხადებს ვახტანგიშვილი.

ამასთან, კოალიციიდან ხაშურის მაჟორიტარი დეპუტატობის კანდიდატის გელაშვილის თქმით, რაიონში ძირითად პრობლემას პოლიციის მიერ მოსახლეობის დაშინება წარმოადგენს.

გელაშვილის განცხადებით, მისთვის მაჟორიტარ კანდიტატად დასახელება „ქართული ოცნების“ მხრიდან მოულოდნელი იყო, შესაბამისად, საარჩევნო პროგრამას იგი უახლოეს დღეებში შეიმუშავებს.
ამასთან, ქარელში კოალიციის მაჟორიტარი ოლიმპიური კომიტეტის ყოფილი ვიცე-პრეზიდენტი ლერი ხაბელოვი იქნება, კასპში კი - ეკონომისტი დავით ონოფრიშვილი.