პარტია „თავისუფალი დემოკრატების“ ერთ-ერთი ლიდერის, კოალიცია „ქართული ოცნების“ წევრის ზურაბ აბაშიძის განცხადებით, კონკრეტულ საარჩევნო საკითხებთან დაკავშირებით ისინი ხელისუფლებასთან სასაუბროდ მზად არიან.

ამის შესახებ აბაშიძემ „ნიუსპრესს“ „ნაციონალური მოძრაობის“ მიერ მომზადებული პოლიტიკური პარტიების ქცევის დეკლარაციის შეფასებისას განაცხადა.

მისი თქმით, ამ ეტაპზე, კოალიციის შიგნით ჯერ გადაწყვეტილი არ არის მოაწერენ თუ არა ხელს დეკლარაციას.

„ჩვენ ვესაუბრებით უწყებათაშორის კომისიაში გიგა ბოკერიას, ასევე, მზად ვართ ვესაუბროთ ხელისუფლებას კონკრეტულ საკითხებზე, რომელიც გამჭირვალეს გახდის საარჩევნო პროცესს, ამის შესახებ ღიად არაერთხელ განვაცხადეთ“ - აღნიშნა კოალიციის წევრმა.

მისივე თქმით, „ნაციონალური მოძრაობის“ მიერ წარდგენილი დეკლარაციის პუნქტებს დამატებითი მუშაობა და ღრმად გაანალიზება სჭირდება.

„ერთიანი ნაციონალური მოძრაობა“ პოლიტიკურ პარტიებს თავისუფალი, სამართლიანი და მშვიდობიანი საარჩევნო კამპანიისთვის ერთობლივი დეკლარაციის მიღებას სთავაზობს.
დოკუმენტში ნათქვამია, რომ დეკლარაციის ხელმომწერმა პარტიებმა, მიუხედავად არსებითი განსხვავებისა, მრავალ საკითხთან დაკავშირებით უნდა აღიარონ თავისუფალი, სამართლიანი და მშვიდობიანი საარჩევნო პროცესების გადამწყვეტი მნიშვნელობა ქვეყნის შემდგომი დემოკრატიული განვითარებისთვის.
„ვაცნობიერებთ რა საარჩევნო პროცესის სამართლიანად წარმართვისათვის ძირითად საკითხებზე შეთანხმების აუცილებლობას, ვაწერთ ხელს წინამდებარე დეკლარაციას და საჯაროდ ვაცხადებთ - უარს ვამბობთ ძალადობაზე საარჩევნო კამპანიის პროცესში, სხვა პარტიის კამპანიისა და აქციების ხელის შეშლაზე, მათ შორის, საკუთარი აქტივისტების მობილიზაციითა და პარალელური აქციების დაგეგმვით. უარს ვამბობთ აგრესიაზე ამომრჩეველთან შეხვედრისა და კომუნიკაციისას. უარს ვამბობთ ძალადობისკენ მოწოდებაზე და სიძულვილის ენის გამოყენებაზე უმცირესობებთან დაკავშირებულ თემებზე. მზად ვართ ვაწარმოოთ საგნობრივ დისკუსიაზე ორიენტირებული საარჩევნო კამპანია“ - ნათქვამია დეკლარაციაში.