„მივესალმებით ევროსაბჭოს გუშინდელ გადაწყვეტილებას საკითხზე - „კონფლიქტი საქართველოში“, რომელიც არის ჩვენი სწორი საგარეო და შიდა პოლიტიკის დადასტურება.
საქართველოს რეგიონების ოკუპაცია და ადამიანის უფლებების კუთხით იქ არსებული მდგომარეობა, 2014 წლის შემდეგ აქტიურად განიხილება, როგორც ევროსაბჭოს, ასევე სხვა შესაბამის საერთაშორისო ფორმატებში, რაც უმნიშვნელოვანესია საერთაშორისო საზოგადოების მხარდაჭერის კონსოლიდაციისთვის“-ამის შესახებ საქართველოს პრემიერ-მინისტრმა გიორგი კვირიკაშვიოლმა მთავრობის დღევანდელ სხდომაზე განაცხადა.

მისი თქმით, ევროპის საბჭოში 2014 წლის შემდეგ ყოველწლიურად მიღებული გადაწყვეტილებები, წარმოადგენს ძალიან მკაფიო საერთაშორისო სამართლებრივ შეფასებას, რუსეთის, როგორც კონფლიქტის მხარის სამართლებრივ პასუხისმგებლობასა და ოკუპირებულ ტერიტორიებზე არსებულ ვითარებაზე.

„ევროპის საბჭოს ქვეყნები ადასტურებენ, რომ რუსეთის არც ერთი უკანონო აქტი, რომელიც მიზნად ისახავს საქართველოს რეგიონების სტატუსის შეცვლას, იურიდიულად მოქმედი არ არის და სამართლებრივი შედეგი არ აქვს.
ასევე, ისინი გამოხატავენ შეშფოთებას არჩილ ტატუნაშვილის, გიგა ოთხოზორიას სიცოცხლის ხელყოფაზე და ადამიანების უკანონო გატაცებასა და დაკავების სხვა ფაქტებზე.
ასევე, ევროსაბჭო მიესალმა საქართველოს მთავრობის სამშვიდობო ინიციატივების პაკეტს და მას ღია მხარდაჭერა გამოუცხადა.
გადაწყვეტილებაში ხაზგასმულია, რომ საქართველოს მთავრობის ეს ინიციატივა წარმოადგენს ნათელ მაგალითს სამშვიდობო პოლიტიკისა და ომით დაშორიშორებულ მოსახლეობას შორის ნდობის აღდგენის მტკიცე ნებაზე.
ევროპის საბჭოს, ისევე როგორც საქართველოს სხვა პარტნიორების მხრიდან ჩვენი სამშვიდობო ინიციატივის აღიარება უმნიშვნელოვანესია მისი შემდგომი ეფექტური განხორციელებისთვის“-განაცხადა პრემიერმა.