კოალიცია „ქართული ოცნების“ ერთ-ერთი ლიდერის, პარტია „თავისუფალი დემოკრატების“ თავმჯდომარის ირაკლი ალასანიას განცხადებით, პრეზიდენტი მიხეილ სააკაშვილი ქართულ პოლიტიკას ქვების სროლის ხანაში ვეღარ დააბრუნებს.
როგორც ალასანიამ ჟურნალისტებს განუცხადა, შიდა ქართლი და კონკრეტულად გორი საქართველოს გულია და იგი ყოველთვის თამაშობდა ერის კონსოლიდაციაში გადამწყვეტ როლს.
„ახლაც ასე იქნება. დღეს აქციაზე ივანიშვილს პროგრამული გამოსვლა ექნება. ის რეგიონისთვის პრიორიტეტულ საკითხებზე გაამახვილებს ყურადღებას, მათ შორის, სოფლის მეურნეობაზე, რათა შიდა ქართლელ გაჭირვებულ გლეხს შრომის საშუალება მიეცეს“-განაცხადა ალასანიამ.
მისივე თქმით, მათი მიზანია მშვიდობიანი, სტაბილური არჩევნების ჩატარება, სადაც ყველა მოქალაქე შეძლებს უსაფრთხო გარემოში თავისუფალი არჩევანის გაკეთებას.
„სამწუხაროდ, სააკაშვილს უნდა ქართული პოლიტიკა ქვების სროლის ხანაში დააბრუნოს, მაგრამ ეს არ გამოუვა. ჩვენ მშვიდად, მიზანმიმართულად გავაგრძელებთ საარჩევნო კამპანიას“-აღნიშნა მან.
კოალიცია „ქართული ოცნების“ აქცია გორში რამდენიმე წუთში დაიწყება. აქციას სხვადასხვა რაიონიდან მხარდამჭერთა კოლონები უკვე შეუერთდნენ.