საპარლამენტო უმრავლესობის წევრის, აკაკი ზოიძის განცხადებით, მისთვის პოლიტსაბჭოს წევრობა თვითმიზანი არასდროს ყოფილა და არც იქნება.

მისივე თქმით, მნიშვნელოვანია, რომ პოლიტსაბჭოს სტრუქტურა პარტიის თავმჯდომარისთვის სამართავად მოქნილი იყოს.

„ჩემთვის პოლიტსაბჭოს წევრობა, ისევე როგორც სხვა წევრებისთვის, ვინც დღეს პოლიტსაბჭოს წევრები არ არიან, თვითმიზანი არ ყოფილა და არც იქნება, რადგანაც პოლიტსაბჭო პირველ რიგში არის ის ორგანო, რომელიც პარტიის სტრუქტურებს აყალიბებს და სტრატეგიულ კურსს განსაზღვრავს. ამას აკეთებს პარტიის თავმჯდომარე და მისთვის ყველაზე მოქნილი სისტემა უნდა შექმნილიყო. ამიტომ შემცირდა წევრთა რაოდენობა 21-დან 15-მდე. მართვის თეორების მიხედვით 15 ადამიანი ის ოპტიმალური სტრუქტურაა, რომელიც შესაძლებელია მართო“- განაცხადა ზოიძემ.

შეგახსენებთ, რომ პოლიტსაბჭოს სხდომის შემდეგ საბჭოს წევრობის კანდიდატთა ვინაობა გახდა ცნობილი. ესენი არიან: ბიძინა ივანიშვილი, გიორგი კვირიკაშვილი, ირაკლი კობახიძე, თამარ ჩუგოშვილი, გიორგი ვოლსკი, ილია ნაკაშიძე, არჩილ თალაკვაძე, მამუკა მდინარაძე, დიმიტრი სამხარაძე, ბიძინა გეგიძე, ირაკლი ტრიპოლსკი, მაია ცქიტიშვილი, სოზარ სუბარი, დავით საგანელიძე, კახა კალაძე.