დიასპორისა და კავკასიის საკითხთა კომიტეტის თავმჯდომარე, ზვიად კვაჭანტირაძე სსიპ შოთა რუსთაველის ეროვნული სამეცნიერო ფონდის გენერალურ დირექტორს, მანანა მიქაბერიძეს შეხვდა.

შეხვედრაზე ფონდის მუშაობის პრიორიტეტები განიხილეს, კერძოდ, საქართველოს შემსწავლელი მეცნიერებებისა და სამეცნიერო კვლევების ხელშეწყობა, ქვეყნის მატერიალური, კულტურული და სულიერი მემკვიდრეობის დაცვა და პოპულარიზაცია. ისაუბრეს საზღვარგარეთ არსებული ქართული მატერიალური და სულიერი მემკვიდრეობის სამეცნიერო კვლევებისათვის სახელმწიფო საგრანტო პროგრამებზე და ფონდის მიერ აღნიშნული მიმართულების დაფინანსებაზე.

პარლამენტის პრესსამსახურის ინფორმაციით, შეხვედრაზე ყურადღება დაეთმო უცხოეთში მოღვაწე თანამემამულეთა მონაწილეობით ერთობლივი კვლევებისათვის სახელმწიფო სამეცნიერო გრანტებს, რომელთა მიზანია უცხოეთის სამეცნიერო-კვლევით ცენტრებსა და კვლევით ინსტიტუტებში მოღვაწე წარმატებულ თანამემამულე მეცნიერებთან საქართველოს სამეცნიერო კადრების მჭიდრო პროფესიული ურთიერთობების დამყარება, მათი სამეცნიერო პოტენციალის გამოყენება და სამშობლოში დაბრუნების მსურველ თანამემამულე მეცნიერთა საქართველოს კვლევით სივრცეში ადაპტირების ხელშეწყობა.

კომიტეტის თავმჯდომარემ ისაუბრა ქ. სტამბოლში ქართული კათოლიკური ეკლესიის ბიბლიოთეკის და არქივის მნიშვნელობაზე. აღნიშნა, რომ ქართველი მეცნიერებისთვის არქივის სრულად ხელმისაწვდომობისათვის ყველაფერი უნდა გაკეთდეს, რადგან მას უდიდესი სამეცნიერო მნიშვნელობა აქვს. ზვიად კვაჭანტირაძემ გამოთქვა იმედი, რომ რუსთაველის ეროვნული სამეცნიერო ფონდი აქტიურად დაუჭერს მხარს ქ. სტამბოლში ქართული არქივის შესწავლას.