ახალგაზრდთა იურისტთა ასოციაცია ორგანიზაცია - „საქართველო არ იყიდება“ საქმიანობასთან დაკავშირებით განცხადებას ავრცელებს.
განცხადებაში ნათქვამია, რომ „მოქალაქეთა პოლიტიკური გაერთიანებების შესახებ“ კანონის 261 მუხლის მოთხოვნათა თანახმად, პარტიისთვის დადგენილი რეგულაციები „ვრცელდება იმ პირზე, რომელსაც აქვს გაცხადებული საარჩევნო მიზნები და რომელიც ამ მიზნების მისაღწევად შესაბამის ფინანსურ და სხვა მატერიალურ რესურსებს იყენებს“.

„როგორც ორგანიზაცია „საქართველო არ იყიდება“-ს განცხადებებიდან იკვეთება, მას არ გააჩნია საარჩევნო მიზანი, თუმცა, შესაძლოა ჰქონდეს პოლიტიკური მიზანი, რაც კანონმდებლობით გამიჯნულია ერთმანეთისგან. აღნიშნული გარემოებებიდან გამომდინარე გაკვირვებას იწვევს ორგანიზაციის მიმართვა სახელმწიფო აუდიტის სამსახურისადმი, სადაც ის 26¹ მუხლით გათვალისწინებულ პირად ცნობას ითხოვს. შესაძლოა, ეს უკავშირდებოდეს ორგანიზაციის სურვილს, ასეთი სტატუსის მიღებით განახოციელოს საქმიანობა, რაც სხვა შემთხვევაში კანონით აკრძალული იქნებოდა“ - ნათქვამია განცხადებში.

კერძოდ, კი საიაში განმარტავენ, რომ საქართველოს კანონმდებლობის მიხედვით, რომელიმე პარტიის საწინააღმდეგოდ ფინანსური რესურსის ხარჯვას იგივე შეზღუდვები უწესდება, რაც პარტიის სასარგებლოდ განხორციელებულ შემოწირულებებს. იმ შემთხვევაში, თუ ის ხორციელდება იურიდიული პირის მიერ, აღნიშნული უკანონოა და ისჯება თანხის ხუთმაგი ოდენობით. 

„მედიასაშუალებებისთვის მიცემულ ინტერვიუში „საქართველო არ იყიდებას“ თავმჯდომარე გიგა ნასარიძე განმარტავს, რომ ორგანიზაციამ კონკრეტული პოლიტიკური სუბიექტის საწინააღმდეგოდ დამზადებული რეკლამა განათავსა ტელეკომპანიების - „რუსთავი2“-ისა და „იმედის“ ეთერში. მიგვაჩნია, რომ „მოქალაქეთა პოლიტიკური გაერთიანებების შესახებ“ კანონის თანახმად ორგანიზაციის მიერ ტელეკომპანიების ეთერში განთავსებული სარეკლამო რგოლები წარმოადგენს იურიდიული პირის მიერ განხორციელებულ შემოწირულებას რეკლამის დამზადებაზე/განთავსებაზე დახარჯული ფინანსური რესურსის მოცულობით. კანონმდებლობაში შესული ცვლილებებით კი, იურიდიულ პირებს აეკრძალათ შემოწირულების განხორციელება“ - განმარტავენ საიაში.

მათივე თქმით, რადგან ორგანიზაცია „საქართველო არ იყიდება“-ს საარჩევნო მიზნები არა აქვს, სახელმწიფო აუდიტის სამსახურმა არ უნდა მოახდინოს მისთვის 26¹ მუხლით გათვალისწინებული სტატუსის მინიჭება, არამედ უნდა იმსჯელოს უკანონო შემოწირულების განხორციელებისთვის მისი დაჯარიმების საკითხზე.

10 ივლისს დარეგისტრირდა არასამეწარმეო (არაკომერციული) იურიდიული პირი „საქართველო არ იყიდება“, რომლის მიზანია საზოგადოებას ამომწურავი ინფორმაცია მიაწოდოს ბიძინა ივანიშილის ქართულ პოლიტიკაში მოღვაწეობის შესახებ, ხელი შეუწყოს ოლიგარქული ფულისა და ჯანსაღი პოლიტიკური პროცესების ერთმანეთისაგან გამიჯვნას, რათა არ მოხდეს საზოგადოების შეცდომაში შეყვანა და ამომრჩეველთა მოსყიდვის წახალისება.