ნატო-ს დღეების ფარგლებში, საქართველოს ვიცე-პრემიერი, საგარეო საქმეთა მინისტრი მიხეილ ჯანელიძე თბილისის სხვადასხვა უნივერსიტეტების სტუდენტებთან შეხვედრას გამართავს.

მიხეილ ჯანელიძე საქართველოს ევროატლანტიკური ინტეგრაციის პროცესსა და ამ კუთხით არსებულ პროგრესზე ისაუბრებს. იგი ყურადღებას გაამახვილებს საქართველო-ნატოს თანამშრომლობაზე, რომელიც ქვეყნის თავდაცვის უნარიანობის ამაღლებასა და გაძლიერებას ემსახურება. საგარეო უწყების ხელმძღვანელი შეხვედრისას ასევე ვრცლად მიმოიხილავს საქართველოს ევროკავშირში ინტეგრაციის პროცესს და ხაზს გაუსვამს მთავრობის საბოლოო მიზანს, რასაც ევროკავშირში სრულფასოვანი წევრობა წარმოადგენს. მინისტრი ასევე ისაუბრეს ნატო-ს დღეების მნიშვნელობასა და მიზანზე.
შეხვედრის ფარგლებში მიხეილ ჯანელიძე სტუდენტების შეკითხვებს უპასუხებს.

შეხვედრას დაესწრებიან ივანე ჯავახიშვილის სახელობის თბილისის სახელმწიფო უნივერსიტეტის, კავკასიის უნივერსიტეტის, საქართველოს საზოგადოებრივ საქმეთა უნივერსიტეტის (GIPA), თავისუფალი უნივერსიტეტის, ეროვნული თავდაცვის აკადემიის, საქართველოს საპატრიარქოს წმიდა ანდრია პირველწოდებულის სახელობის ქართული უნივერსიტეტის, საქართველოს უნივერსიტეტის, ბიზნესისა და ტექნოლოგიების უნივერსიტეტის, ქართულ-ამერიკული უნივერსიტეტის, ევროპული ახალგაზრდული ცენტრის, შავი ზღვის საერთაშორისო უნივერსიტეტის, კავკასიის საერთაშორისო უნივერსიტეტის, სოხუმის უნივერსიტეტის და ტექნიკური უნივერსიტეტის სტუდენტები. ასევე, ახალგაზრდული არასამთავრობო ორგანიზაციების YATA Georgia და YES Georgia წარმომადგენლები.

ნატოს დღეები წელს მეთერთმეტედ აღინიშნება და 16 აპრილიდან 1 მაისამდე გაგრძელდება. ღონისძიება საქართველოში სსიპ „საინფორმაციო ცენტრის ნატოსა და ევროკავშირის შესახებ“ ორგანიზებით, საგარეო საქმეთა სამინისტროს, საქართველოში ნატო-ს სამეკავშირეო ოფისისა და საქართველოში ბულგარეთის საელჩოს (ნატოს საკონტაქტო საელჩო) მხარდაჭერით იმართება.