პარტია „ახალი მემარჯვენეების“ ერთ-ერთი ლიდერი მანანა ნაჭყებია საქართველოს ხელისუფლებას სოფლის სკოლებისადმი უყურადღებობაში ადანაშაულებს.
როგოც ნაჭყებიამ დღეს გამართულ ბრიფინგზე განაცხადა, საქართველოში რამდენიმე ასეული სკოლა დანგრევის პირასაა.
მისი თქმით, სოფლების სკოლებში უკიდურესად მძიმე მატერიალურ-ტექნიკურ მდგომარეობას რამდენიმე მიზეზი განაპირობებს.
„ეს არის ზოგადად ხელისუფლების დამოკიდებულება განათლების სისტემის მიმართ, რომლისთვისაც მიუხედავად პრიორიტეტად დეკლარირებისა, ბიუჯეტიდან მიზერული თანხაა გამოყოფილი. ეს სისტემის უკიდურესი ცენტრალიზაცია და განათლების მატერიალურ-ტექნიკური ბაზის შექმნასა და შენახვაში ადგილობრივი თვითმმართველობების როლის პრაქტიკულად გამორიცხვაა“- აღნიშნა ნაჭყებიამ.
მისივე თქმით, ე.წ. ოპტიმიზაციის მცდარი და დანაშაულებრივი პროცესის მიხედვით, სამინისტრო სოფლების სკოლების რაოდენობას ამცირებს და რამდენიმე სოფელზე მხოლოდ ერთ სკოლას ტოვებს.
„ახალი მემარჯვენეები" განათლების სამინისტროს ახალ ხელმძღვანელობას სოფლებში სკოლების მოწესრიგებას სთხოვენ.