პარლამენტარის დავით ჭიჭინაძის განცხადებით, ირაკლი კობახიძემ და მამუკა მდინარაძემ პარტიული დისციპლინა დაარღვიეს, როდესაც პრემიერ-მინისტრის განცხადება გააკრიტიკეს.
ამ საკითხზე საუბრისას, ჭიჭინაძემ ზურაბ ჟვანიასა და ნინო ბურჯანაძის მაგალითები მოიტანა და განაცხადა, რომ როცა მათ აღარ მოსწონდათ ედუარდ შევარდნაძის და მიხეილ სააკაშვილის გუნდები, დატოვეს ის.

„მათ დაარღვიეს პარტიული დისციპლინა, როდესაც გააკრიტიკეს პრემიერ-მინისტრის განცხადება. ეს არ იყო მათი პრემიერ–მინისტრის საწინააღმდეგო პირველი განცხადება. შეგიძლიათ ყველაფერს გადახედოთ. ამ ახალგაზრდა ყმაწვილებს საკუთარი აზრი ჩამოუყალიბდათ. არის ასეთი ფრინველი გუგული, რომელიც სხვის ბუდეში დებს კვერცხებს. ეს ხალხი ძალიან გავს გუგულს.
ჩვენ რაც აქ ვართ, პრეტენზია გვაქვს, რომ ის შეთანხმება, რომელიც გუნდის შიგნით გვაქვს, სხდომათა დარბაზში არ სრულდება ხოლმე და ხდება უხეში ჩარევა. ამაზე იყო პრეტენზიები.
ჟვანიას არ მოსწონდა შევარდნაძე დატოვა, ბურჯანაძეს არ მოსწონდა სააკაშვილი დატოვა მისი გუნდი. ასე რომ, არც ერთი თანამდებობა არ აძლევს ადამიანს იმ ინდულგენციას, რომ გააკრიტიკოს იმ პარტიის თავმჯდომარე, რომელშიც არის“- განაცხადა ჭიჭინაძემ.