შვედეთის მწერალთა სახლში, საქართველოს საელჩოს, ქართული წიგნის ეროვნული ცენტრისა და შვედეთის მწერალთა კავშირის მხარდაჭერით, ცნობილი ქართველი მწერლის, არჩილ ქიქოძის წიგნის პრეზენტაცია გაიმართა.
ღონისძიებაზე დამსწრე საზოგადოებას მისასალმებელი სიტყვით მიმართეს საქართველოს ელჩმა მალხაზ კაკაბაძემ და მწერალთა კავშირის წარმომადგენელმა ანეტ როსენგრენმა.
არჩილ ქიქოძემ წარადგინა მოთხრობების კრებული „ჩიტის და კაცის ამბავი“, რომელიც 2017 წელს შვედურ ენაზე გამოიცა. ქართველმა მწერალმა ისაუბრა საკუთარი შემოქმედების შესახებ და მიმოიხილა ქართული ლიტერატურული ტრადიციები.
ღონისძიებაში მონაწილეობა ასევე მიიღო შვედეთში მცხოვრებმა ქართველმა პოეტმა ზურაბ რთველიაშვილმა. მან ქართულ და შვედურ ენაზე წაიკითხა საკუთარი ლექსები კრებულიდან „პოეზიის დიქტატურა“და „150 000 მეგაჰერცი“.
შეხვედრის დასასრულს არჩილ ქიქოძემ და ზურაბ რთველიაშვილმა დამსწრე საზოგადოების კითხვებს უპასუხეს. ღონისძიებას ესწრებოდნენ შვედეთის მწრალთა კავშირის წარმომადგენლები, შვედი მწერლები და პოეტები, ასევე საქართველოს შვედ მეგობართა საზოგადოების წევრები.

ღონისძიების დასრულების შემდეგ, საელჩო დამსწრე სტუმრებს ქართული ღვინითა და კერძებით გაუმასპინძლდა.