შინაგან საქმეთა სამინისტროს საზღვაო ოპერაციების ერთობლივი მართვის ცენტრს (JMOC) ამერიკის შეერთებული შტატების სამხედრო-საზღვაო ძალების წარმომადგენლები ეწვივნენ.
სტუმრებს სასაზღვრო პოლიციის უფროსმა, თეიმურაზ კეკელიძემ უმასპინძლა.
სასაზღვრო პოლიციის პრესსამსახურის ინფორმაციით, შეხვედრაზე მხარეებმა შავი ზღვის რეგიონის უსაფრთხოების საკითხებზე, ერთობლივ ღონისძიებებსა და პროექტებზე ისაუბრეს.
ვიზიტის ფარგლებში, საზღვაო ოპერაციების ერთობლივი მართვის ცენტრის წარმომადგენლებმა აშშ-ს ხომალდის ეკიპაჟის წევრებს ცენტრის ინფრასტრუქტურა დაათვალიერებინეს, მისი საქმიანობის შესახებ დეტალური ინფორმაცია მიაწოდეს და სამომავლო გეგმები გააცნეს.
საზღვაო ოპერაციების ერთობლივი მართვის ცენტრი, შინაგან საქმეთა სამინისტროს სასაზღვრო პოლიციის სანაპირო დაცვის დეპარტამენტის ბაზაზე, აშშ-ს ექსპორტის კონტროლისა და საზღვრის უსაფრთხოების პროგრამის (EXBS) დაფინანსებით აშენდა. ცენტრის სხვადასხვა სახელმწიფო უწყებას აერთიანებს, რომლებსაც კოორდინაციას შს სამინისტრო უწევს.
უწყების ცნობით, ცენტრის მიზანია საქართველოს საზღვაო სივრცეში არსებული საფრთხეების წინააღმდეგ ეფექტური ბრძოლა; ზღვაზე არალეგალური ქმედებების, საზღვაო ინციდენტებისა და საზღვაო სივრცის სამართლებრივი რეჟიმის კონტროლი; პრევენცია, გამოვლენა და რეაგირება დარღვევებზე, რომლებიც საფრთხეს უქმნის, როგორც საქართველოს, ისე მთელ რეგიონს; საზღვაო უსაფრთხოებასთან დაკავშირებული ინფორმაციის გაცვლის ერთიანი სისტემის შექმნა; ერთიანი მართვის ცენტრის მონაწილე უწყებების მიერ ერთობლივი საზღვაო ოპერაციების, ასევე, კრიზისულ სიტუაციებში შეთანხმებულ მოქმედებათა დაგეგმვისა და განხორციელების უზრუნველყოფა.