პარლამენტის გარემოს დაცვისა და ბუნებრივი რესურსების კომიტეტმა დღეს 2018-2030 წლების სტრატეგიისა და 2018-2020 წლების სამოქმედო გეგმის პრეზენტაცია გამართა,რომელშიც ხაზგასმულია პარლამენტის როლი საქართველოს გარემოსდაცვით გამოწვევებთან ბრძოლაში და აღწერილია კონკრეტული გზები გარემოს დაცვასთან დაკავშირებულ საკითხებზე საპარლამენტო ზედამხედველობის გასაუმჯობესებლად.
პარლამენტის პრესსამსახურის ინფორმაციით, ეს დოკუმენტები ევროკავშირისა (EU) და გაეროს განვითარების პროგრამის (UNDP) ხელშეწყობითაა შემუშავებული და მათი ერთ-ერთი უმთავრესი მიზანი გარემოს დაცვაზე საპარლამენტო ზედამხედველობის გაძლიერებაა.
პრეზენტაციის მონაწილეებს მისასალმებელი სიტყვით მიმართეს გარემოს დაცვისა და ბუნებრივი რესურსების კომიტეტის თავმჯდომარემ კახაბერ კუჭავამ, საქართველოში ევროკავშირის წარმომადგენლობის გარემოს დაცვისა და სოფლის განვითარების მიმართულების პროგრამის მენეჯერმა ალვარო ორტეგა აპარისიომ, გაეროს განვითარების პროგრამის (UNDP) პროგრამების ხელმძღვანელის მოვალეობის შემსრულებელმა გიგი ბრეგაძემ.
მათ ისაუბრეს კომიტეტის 2018-2030 წლების სტრატეგიისა და 2018-2020 წლების სამოქმედო გეგმის მნიშვნელობაზე, პარლამენტის მჭიდრო თანამშრომლობაზე მთავრობასთან და არასამთავრობო ორგანიზაციებთან და მოქალაქეთა ჩართულობაზე ამ პროცესში. ევროკავშირისა და გაეროს განვითარების პროგრამის წარმომადგენლებმადაადასტურეს მზადყოფნა სამომავლო თანამშრომლობისათვის.
„ეს არის ძალიან მნიშვნელოვანი ღონისძიება, რადგანც ის პირდაპირ უკავშირდება საქართველოსა და ევროკავშირის დაახლოების პროცესს. ასოცირების ხელშეკრულებით გათვალისწინებულია სხვადასხვა სახის გარემოსდაცვითი სტანდარტები, რომლებიც საქართველომ უნდა დაიცვას და ამ პროცესის წარმატებაში საქართველოს პარლამენტს უდიდესი როლი აკისრია. გარდა ამისა, ევროკავშირის ხელშეწყობით, საქართველოს პარლამენტი გაზრდის საზედამხედველო ფუნქციას,რომელიც გარემოსდაცვით საკითხებს ეხება. ეს არის ახალი ინიციატივა და ჩვენ ძალიან დიდი იმედი გვაქვს, საქართველოს პარლამენტი ძალიან წარმატებული იქნებაამ საქმიანობაში“, - განაცხადა საქართველოში ევროკავშირის წარმომადგენლობის გარემოს დაცვისა და სოფლის განვითარების მიმართულების პროგრამის მენეჯერმა ალვარო ორტეგა აპარისიომ და აღნიშნა, რომ ევროკავშირი მომავალშიც გააგრძელებს საქართველოს პარლამენტის ხელშეწყობას.
შეკრებილთ ასევე მიმართა ფრაქცია „ქართული ოცნების“ თავმჯდომარემ მამუკა მდინარაძემ და აღნიშნა, რომ ფრაქციის ერთ-ერთი პირველი და მთავარი პრიორიტეტიიქნება გარემოსდაცვითი მიმართულებით საქმიანობა და მხარდაჭერა იმ კომიტეტის, რომელიც წარმატებით ართმევს თავს ფუნქცია-მოვალეობებს და თავის საქმიანობაშინერგავს საპარლამენტო ზედამხედველობის ახალ მიმართულებას, რომელმაც თბილისში ჰაერის დაბინძურების პრევენცია უნდა უზრუნველყოს.
„გარემოს დაცვა ფუნდამენტურად მნიშვნელოვანია საქართველოს წინსვლისა და განვითარებისათვის, მათ შორის, ისეთ საკვანძო საკითხებში, როგორიცაა ეკონომიკური ზრდა და საერთაშორისო ურთიერთობები. ევროკავშირთან ასოცირების შესახებ შეთანხმებისა და მდგრადი განვითარების მიზნების ფარგლებში,საქართველომ კონკრეტული გარემოსდაცვითი ვალდებულებები აიღო. პარლამენტი თავის მნიშვნელოვან წვლილს შეიტანს ამ ვალდებულებების წარმატებით შესრულებაში“, - განაცხადა გარემოს დაცვისა და ბუნებრივი რესურსების საპარლამენტო კომიტეტის თავმჯდომარემ კახაბერ კუჭავამ გარემოს დაცვისა და ბუნებრივი რესურსების კომიტეტის 2018-2030 წლების სტრატეგია და 2018-2020 წლების სამოქმედო გეგმის დეტალური წარდგენისას და კომიტეტის ახალ ინიციტივებზე საუბრისას.