სერბეთი საქართველოს სუვერენიტეტსა და ტერიტორიულ მთლიანობას, ქვეყნის ევროპულ ინტეგრაციას და საქართველოსთან ორმხრივი თანამშრომლობის გაღრმავებას მხარს უჭერს.
ამის შესახებ სერბეთის პრეზიდენტმა ალექსანდარ ვუჩიჩმა საქართველოს ვიცე-პრემიერთან, საგარეო საქმეთა მინისტრთან მიხეილ ჯანელიძესთან შეხვედრაზე განაცხადა.
საქართველოს საგარეო საქმეთა პრესსამსახურის ცნობით, შეხვედრაზე სერბეთის პრეზიდენტმა ხაზი გაუსვა საქართველოსთან არსებულ მეგობრულ ურთიერთობებს და გამოთქვა მზადყოფნა ქვეყნებს შორის სხვადასხვა სფეროში თანამშრომლობის განვითარებასა და გაღრმავებას ხელი შეუწყოს .
შეხვედრაზე თბილისსა და ბელგრადში სრულფასოვანი დიპლომატიური მისიის ამოქმედებამდე დიპლომატების დანიშნვის შესაძლებლობა განიხილეს. ორივე მხარემ ხელის შეწყობის მზადყოფნა გამოთქვა.
სერბეთის პრეზიდენტი მიესალმა საქართველოსა და სერბეთს შორის უვიზო მიმოსვლის შესახებ შეთანხმებას, რომელიც მიხეილ ჯანელიძის სერბეთში ვიზიტის ფარგლებში გაფორმდება და აღნიშნა, რომ სერბეთის მთავრობა აღნიშნული შეთანხმების ამოქმედებას უახლოეს დღეებშივე მოახდენს. მხარეებმა ხაზი გაუსვეს უვიზო მიმოსვლის მნიშვნელობას ხალხთაშორისი კონტაქტებისა და ტურიზმის სფეროში თანამშრომლობის გაღრმავებისთვის.
ასევე განხილული იქნა საქართველოსა და სერბეთის შემდგომი თანამშრომლობის პერსპექტივები სხვადასხვა სფეროში, მათ შორის პრეზიდენტმა გამოხატა მზადყოფნა ხელი შეუწყოს სავაჭრო-ეკონომიკურ სფეროში წარმატებულ ურთიერთობებს. მათ შორის სერბული მხარე დაინტერესდა საქართველოს წარმატებული ეკონომიკური რეფორმების მიმდინარეობით, რაც კარგ საფუძველს ქმნის ბიზნეს წრეებს შორის შემდგომი კავშირებისათვის. ამ მხრივ მხარეები მიესალმნენ ერთობლივი ბიზნეს ფორუმების გამართვას, აღსანიშნავია, რომ თბილისში საქართველო-სერბეთის ბიზნეს ფორუმის ორგანიზება იგეგმება.

საქართველოს საგარეო უწყების ხელმძღვანელმა ალექსანდ ვუჩიჩს ევროინტეგრაციის გზაზე სერბეთის წარმატება მიულოცა. კიდევ ერთხელ გამოიხატა ამ გზაზე სერბეთის გამოცდილების გაზიარებისადმი ინტერესი. ამ მხრივ აღინიშნა უწყებებს შორის წარმატებული თანამშრომლობა, მათ შორის ორი ქვეყნის შინაგან საქმეთა და იუსტიციის სამინისტროებს შორის.
სერბეთის პრეზიდენტთან შეხვედრაზე ორმხრივი თანამშრომლობის შემდგომ წარმატებაში, მაღალი დონის ვიზიტებისა და შეხვედრების მნიშვნელობას ხაზი გაესვა . კიდევ ერთხელ დადებითად შეფასდა სერბეთის პრეზიდენტსა და საქართველოს პრემიერ-მინისტრს შორის დავოსში გამართული შეხვედრა, რომელმაც მნიშვნელოვანი ბიძგი მისცა შემდგომი თანამშრომლობის განვითარებას მრავალი მიმართულებით. სერბეთის პრეზიდენტმა საქართველოს პრემიერი ბელგრადში ოფიციალური ვიზიტით მიიწვია.
სერბეთში ოფიციალური ვიზიტის ფარგლებში მიხეილ ჯანელიძემ, ასევე სერბეთის რესპუბლიკის პრემიერ-მინისტრთანაც შეხვედრა გამართა . დაგეგმილია შეხვედრები სერბეთის რესპუბლიკის ევროინტეგრაციის მინისტრთან და სერბეთის საგრეო საქმეთა მინისტრთან, რა დროსაც ქვეყნებს შორის უვიზო მიმოვლის შესახებ შეთანხმდება გაფორმდება.