დედაქალაქის მერმა კახა კალაძემ საქართველოს პარლამენტში გამართულ თვითმმართველობის განვითარების ხედვის პრეზენტაციაზე საცხოვრებელი გარემოსა და ყოფის გაუმჯობესებისთვის, თვითმმართველობის პროცესში მოქალაქეთა ჩართულობის ზრდის აუცილებლობაზე ისაუბრა.
კალაძის თქმით, მნიშვნელოვანია, რომ ყურადღება დაეთმოს ანგარიშვალდებულებისა და გამჭირვალეობის ხარისხის გაზრდას.
"ჩვენ ყველამ ერთად უნდა ვმართოთ, ერთად ვიზრუნოთ ჩვენი საცხოვრებელი გარემოსა და ჩვენი ყოფის გაუმჯობესებაზე, ამიტომაც საჭიროა, კიდევ უფრო მეტად გაიზარდოს მოქალაქეთა ჩართულობა თვითმმართველობის პროცესში, ყურადღება დაეთმოს ანგარიშვალდებულებისა და გამჭირვალეობის ხარისხის ზრდას, გაიზარდოს თვითმმართველობის უფლებამოსილება და რესურსები, გაუმჯობესდეს სერვისები და ეფექტიანად გადაიჭრას მოსახლეობის პრობლემები, რათა თვითმმართველობის ორგანოებსა და მოქალაქეებს შორის შემცირდეს დისტანცია, გაჩნდეს ნდობა და განვითარდეს თანამშრომლობა. ადგილობრივი თვითმმართველობის გაძლიერება მხოლოდ ამ გზითაა შესაძლებელი" - აღნიშნა დედაქალაქის მერმა.
მისი თქმით, სწორედ ძლიერ თვითმმართველობაზეა დამოკიდებული ქვეყნის დემოკრატიული და ეკონომიკური განვითარება. ამიტომ, მნიშვნელოვანია "ქართული ოცნების" ხელისუფლების პირობებში განხორციელებული თვითმმართველობის რეფორმის მდგრადობის უზრუნველყოფა.
"ვფიქრობ არც ერთი ხედვა არ გაამართლებს, თუ მის ძირითად პრინციპებს და ეფექტიანი თვითმმართველობის განხორციელების პროცესზე პასუხისმგებლობას თანაბრად არ გაიზიარებს ყველა - როგორც ცენტრალური ხელისუფლება, ისე, თვითმმართველობა და მთლიანად, საზოგადოება. მზად ვართ მონაწილეობა მივიღოთ ამ რეფორმებში. ჩვენი მიზანია, რომ კიდევ უფრო მეტი სიახლოვე იყოს მოსახლეობასთან, კიდევ უფრო მეტი შესაძლებლობები მივცეთ ადამიანებს, ჩაერთონ თავიანთი რეგიონებისა და ქალაქების განვითარებაში და ერთად მოვაგვაროთ ის პრობლემები, რომელიც დღეს აქტუალურია" - განაცხადა კახა კალაძემ.
თვითმმართველობის განვითარების ხედვის პრეზენტაციას საქართველოს პრემიერ-მინისტრი, პარლამენტის თავმჯდომარე, დიპლომატიური კორპუსი, არასამთავრობო სექტორისა და თვითმმართველობის წარმომადგენლები ესწრებოდნენ.