„სახალხო კრების“ აღმასრულებელი საბჭოს თავმჯდომარის, საზოგადოებრივი მოძრაობა „ქართული ოცნების“ სპორტის თემატური ჯგუფის  წევრის ნონა გაფრინდაშვილის შეფასებით, ქვეყანას, რომელშიც სპორტსმენი იძულებული ხდება პოლიტიკაში ჩაერთოს, პრობლემები აქვს.
„პოლიტიკაში ამდენი მსოფლიო და ოლიმპიური ჩემპიონის წასვლა ნიშნავს, რომ ამ ქვეყნის საქმე კარგად არ არის. ის სპორტული სამყარო, რომელშიც ვცხოვრობდი, ყველაფერს მირჩევნია და ასეა ყველა სპორტსმენი, მაგრამ არსებული მდგომარეობიდან გამომდინარე, პოლიტიკაში ჩართვა გვიწევს“ - აღნიშნა გაფრინდაშვილმა.
მისივე თქმით, არ შეიძლება ადამიანს საკუთარი აზრის დაფიქსირების გამო ხელისუფლება მტრად მიიჩნევდეს.
„სპორტსმენი უნდა იყოს თავისი ქვეყნის სამსახურში და არა რომელიმე პოლიტიკური ჯგუფის. ჩვენ გვინდა, რომ ამ ქვეყანაში სპორტი თავისუფალი იყოს“ - განაცხადა გაფრინდაშვილმა.
საზოგადოებრივი მოძრაობა „ქართული ოცნების“ სპორტის თემატური ჯგუფი საერთაშორისო საზოგადოებასა და საერთაშორისო სპორტულ ორგანიზაციებს მიმართვას უგზავნის და საქართველოს ხელისუფლების მხრიდან სპორტსმენებზე ზეწოლისა და რეპრესიების ფაქტებზე სათანადო რეაგირებას სთხოვს.