საქართველოს პარლამენტის თავმჯდომარე, რომელიც ოფიციალური ვიზიტით იორდანიის ჰაშიმიტურ სამეფოში იმყოფება, თანმხლებ დელეგაციასთან ერთად, იორდანია-საქართველოს საპარლამენტო მეგობრობის ჯგუფის ხელმძღვანელ მუსტაფა იაღის და ჯგუფის წევრებს შეხვდა.
შეხვედრაზე სხვადასხვა მიმართულებებით - მათ შორის, საპარლამენტო, ეკონომიკური, განათლების, ჯანდაცვისა და ტურიზმის სფეროში ურთიერთობის გააქტიურების შესაძლებლობები განიხილეს. მხარეები მჭიდრო თანამშრომლობაზე შეთანხმდნენ.
„იორდანიაში საკმაოდ განვითარებულია სამედიცინო ტურიზმი, ასევე, ის მსოფლიოში მესამე ქვეყანაა მყარი ვალუტით. ეს ის მიმართულებებია, რომლებიც მსგავსია ჩვენი ქვეყნის ეკონომიკისთვის და ბუნებრივია, საქართველო ძალიან დაინტერესებულია სამედიცინო ტურიზმის გაფართოებაში, ასე რომ, ჩვენ შეიძლება, ბევრი რამ გავიზიაროთ იორდანიის გამოცდილებიდან. იორდანია მშვიდობისმყოფელი ქვეყანაა, რომელიც არ ომობს თავის მეზობლებთან, და ბუნებრივია, ჩვენ გვჭირდება, მათ შორის, ეს გამოცდილებაც, იმიტომ, რომ ჩვენი საგარეო პოლიტიკა ეფუძნება პრაგმატიზმს და ეროვნულ ინტერესებს“,- განაცხადა შეხვედრის დასრულების შემდეგ იორდანიის ჰაშიმიტური სამეფოს პარლამენტთან მეგობრობის ჯგუფის ხელმძღვანელმა, ზაქარია ქუცნაშვილმა.
საქართველოს საპარლამენტო დელეგაციის წევრის, მამუკა მდინარაძის განცხადებით, ქართულმა მხარემ იორდანია-საქართველოს საპარლამენტო მეგობრობის ჯგუფი საქართველოში მოიწვია.

„მათ აქვთ ჩვენი მსგავსი გამოწვევები და საუბრობენ პრიორიტეტებზე. როგორც აღმოჩნდა, ეს პრიორიტეტებია განათლების სფერო, ჯანდაცვის სფერო, აგრეთვე, ტურიზმი და ამ საკითხებთან დაკავშირებით, შესაძლებელია გარკვეული გამოცდილების გაზიარება. ჩვენ ისინი მოვიწვიეთ საქართველოში და ამასთან დაკავშირებით, შესაძლებელია, დამატებით კონსულტაციები გაიმართოს“,- განაცხადა მამუკა მდინარაძემ.

საქართველოს პარლამენტის დელეგაცია, რომლის შემადგენლობაშიც დეპუტატები: ზაქარია ქუცნაშვილი, მამუკა მდინარაძე, შალვა კიკნაველიძე, ირაკლი მეზურნიშვილი, მამუკა ჩიქოვანი და საქართველოს პარლამენტის თავმჯდომარის კაბინეტის უფროსი, ნიკოლოზ სამხარაძე შედიან, იორდანიის ჰაშიმიტურ სამეფოში ვიზიტს 1 მარტს დაასრულებს.